Tensionet mes Shteteve të Bashkuara dhe Iranit janë përshkallëzuar sërish, pas disa javësh qetësie relative në frontin ushtarak. Në orët e para të 31 gushtit, Teherani lëshoi raketa drejt objektivave në Jordani, ku ndodhen edhe forca amerikane.
Sipas një zyrtari amerikan të cituar nga Fox News, pothuajse të gjitha raketat e lëshuara nga Irani u interceptuan. Në shënjestër raportohet se ishin zona e Aqabas dhe baza ajrore Muwaffaq Salti, ku janë të dislokuara edhe trupa të ushtrisë amerikane.
Sulmi iranian erdhi si kundërpërgjigje ndaj një goditjeje të forcave amerikane në ishullin Larak, ku u goditën dy sisteme raketore iraniane.
Komanda Qendrore e SHBA-së deklaroi se operacioni nuk përbënte një “akt agresioni”, por ishte drejtuar kundër njësive të minimit detar të Gardës Revolucionare iraniane. Sipas Uashingtonit, këto njësi përbënin një kërcënim të menjëhershëm në ngushticën e Hormuzit.
Vetëm disa orë më vonë, Garda Revolucionare iraniane njoftoi se një supercisternë nafte kishte marrë flakë pasi kishte shkelur rregullat dhe ishte përplasur me dy mina detare.
Zhvillimet vijnë në një moment kur ngushtica e Hormuzit mbetet një nga pikat më të ndjeshme të konfliktit, për shkak të rëndësisë strategjike që ka për transportin ndërkombëtar të naftës.
Ndërkohë, tensionet duket se janë shtrirë edhe në pjesë të tjera të rajonit. Garda Revolucionare iraniane pretendoi se kishte kryer një sulm ndaj Emirateve të Bashkuara Arabe, por ky pretendim u mohua nga ministri i Mbrojtjes i Emirateve.
Përplasja e fundit shënon rikthimin e konfrontimit të drejtpërdrejtë mes Uashingtonit dhe Teheranit, ndërsa konflikti ka hyrë në muajin e tij të shtatë.
