Ditën e nesërme, në orën 10:00, në Pallatin e Kongreseve do të mbahet Kuvendi Kombëtar i Partisë Demokratike, një mbledhje që vjen në një moment të rëndësishëm për forcën më të madhe opozitare në vend.
Këtë herë, demokratët kanë zgjedhur sloganin “Ripërtëritje”, duke synuar të përcjellin një mesazh për riorganizim dhe një fazë të re politike brenda partisë.
Kuvendi zhvillohet disa vite pas përçarjes së madhe që shënoi PD-në.
Pritet që në Kuvendin e nesërm të diskutohen drejtimet politike të partisë, organizimi i brendshëm dhe objektivat për periudhën në vijim. Kreu i grupit parlamentar të PD, Gazmend Bardhi, do të paraqesë para Kuvendit 8 ndryshimet statutore, të cilat më tej do të hidhen në votim.
