Partia Demokratike ka publikuar listën e anëtarëve fitues të Këshillit Kombëtar pas votimit të zhvilluar në Kuvendin Kombëtar të 30 majit 2026 dhe numërimit të votave nga 13 Komisionet e Numërimit.
Nga lista e publikuar mungon emri i Andi Mustafajt, i cili nuk rezulton mes kandidatëve fitues nga votimi i Kuvendit Kombëtar.
Ndërkohë, mes fituesve figuron Arkimed Lushaj, i njohur me emrin artistik Stresi.
Mbrëmë në një emision televiziv, Andi Mustafaj ka deklaruar se pret të jetë pjesë e Këshillit Kombëtar përmes kuotës së diasporës. Një mundësi e tillë parashikohet edhe në statutin e Partisë Demokratike.
Në njoftimin zyrtar, PD sqaron se lista e publikuar nuk është përbërja përfundimtare e Këshillit Kombëtar. Sipas nenit 44 të statutit, asaj do t’i shtohen edhe 15 për qind anëtarë përfaqësues të diasporës, të cilët do të zgjidhen në një fazë të mëvonshme me propozim të kryetarit të partisë dhe miratim nga Kryesia e PDSH-së.
Partia Demokratike thekson gjithashtu se nga votimi është tejkaluar minimumi statutor për përfaqësimin e të rinjve, duke arritur në 30 për qind të listës fituese, si dhe është respektuar kuota e re për përfaqësimin e grave dhe vajzave.
