Tetëdhjetë e katër minuta paniku në ajër. Një fluturim i Flydubai nga Dubai drejt Tel Avivit u detyrua të bënte ulje emergjente në aeroportin ndërkombëtar të Tabukut, në Arabinë Saudite, pas një incidenti të rëndë në kabinën e pilotimit.
Sipas raportimeve paraprake, në bordin e avionit Boeing 737 Max 8, me rreth 180 pasagjerë, dyshohet se ka pasur një përplasje fizike në kabinë, ku piloti dhe bashkëpiloti janë parë të gjakosur. Një video e filmuar nga pasagjerët, që po qarkullon në rrjet, tregon pilotin të plagosur dhe pothuajse në gjendje të rënduar, ndërsa bashkëpiloti shihet i neutralizuar me duart pas shpine.
Në video, një pasagjer izraelit dëgjohet t’i thotë pilotit: “Ti shpëtove avionin”. Një tjetër pasagjer tregon personin e shtrirë në tokë dhe thotë: “Ky është njeriu që e goditi me thikë”.
Ngjarja ndodhi rreth një orë pas nisjes nga Dubai. Avioni po fluturonte në hapësirën ajrore të Arabisë Saudite, në lartësi mbi 10 mijë metra, kur pësoi një ulje të papritur dhe të fortë. Sipas të dhënave të fluturimit, në më pak se një minutë ai zbriti nga rreth 10 mijë metra në afro 5 mijë metra, ndërsa shpejtësia u rrit ndjeshëm.
Pak minuta më vonë, avioni transmetoi kodin 7700, që tregon emergjencë të përgjithshme. Më pas u raportua edhe kodi 7500, sinjal ndërkombëtar për ndërhyrje të paligjshme në bord ose dyshim për rrëmbim.
Autoritetet izraelite dhe saudite kanë nisur hetimet, ndërsa pasagjerët po merren në pyetje. Izraeli po e trajton rastin si një incident të mundshëm terrorist dhe po verifikon nëse ka pasur tentativë për rrëzimin e avionit.
Për shkak të alarmit, aviacioni ushtarak izraelit ngriti avionë luftarakë, ndërsa zyra e kryeministrit Benjamin Netanyahu u njoftua për situatën në kohë reale.
Për momentin, shumë detaje mbeten ende të pakonfirmuara. E sigurt është se fluturimi FZ1073 nuk mbërriti në Tel Aviv, por u ul në Tabuk në gjendje emergjence, pas një prej incidenteve më të pazakonta dhe më shqetësuese të raportuara së fundmi në aviacionin civil.
