Guvernatori i Kalifornisë, Gavin Newsom, ka nënshkruar ligjin AB 2017, i cili njeh zyrtarisht në legjislacionin e shtetit festat islame të Fitër Bajramit dhe Kurban Bajramit.
Vendimi është përshëndetur nga dega e Këshillit për Marrëdhëniet Amerikano-Islame në Kaliforni, e cila e ka cilësuar miratimin e ligjit si një hap që synon të lehtësojë pjesëmarrjen e myslimanëve në festat kryesore fetare pa u përballur me pengesa në shkollë apo në vendin e punës.
Projektligji u hartua nga deputeti Matt Haney dhe u bashkëmbështet nga CAIR-CA, Komisioni i Kalifornisë për Çështjet e Amerikanëve Aziatiko-Paqësorë dhe Muslim Impact Council.
Sipas ligjit, punonjësit e shtetit dhe të shkollave mund të përdorin ditët ekzistuese të pushimit personal ose lejen për të kremtuar Bajramin. Ndërkohë, shkollat fillore dhe të mesme, si dhe kolegjet komunitare, mund të mbyllen gjatë festës, nëse kjo përcaktohet përmes marrëveshjeve të negociuara në nivel lokal.
Nisma synon të adresojë një problem të përsëritur për komunitetin mysliman në Kaliforni, ku jetojnë më shumë se një milion myslimanë, sipas CAIR-CA. Deri tani, mungesa e njohjes së këtyre festave në nivel shtetëror ka bërë që nxënës, studentë dhe punonjës të kërkojnë leje ose të mungojnë në shkollë e punë për të marrë pjesë në ceremonitë fetare.
Drejtori ekzekutiv i CAIR-CA, Hussam Ayloush, tha se për vite me radhë myslimanët në Kaliforni janë përballur me zgjedhjen mes respektimit të festave të rëndësishme fetare dhe detyrimeve të tyre akademike apo profesionale.
Sipas Ayloush, ligji synon të heqë këto pengesa dhe të përshtasë politikat shtetërore me parimet e përfshirjes, barazisë dhe respektimit të diversitetit kulturor.
Miratimi i ligjit vjen gjithashtu në një periudhë kur CAIR ka raportuar rritje të incidenteve që kanë prekur xhamitë dhe qendrat islame në SHBA. Sipas organizatës, incidentet e raportuara nga maji deri në korrik 2026 u rritën me 183% krahasuar me të njëjtën periudhë të vitit të kaluar.
AB 2017 u miratua përfundimisht nga legjislatura e Kalifornisë në fund të gushtit dhe iu dërgua guvernatorit për firmë. Newsom e nënshkroi ligjin më 28 shtator 2026.
