Franca është përfshirë prej ditësh nga protesta dhe greva, me studentë dhe punonjës të sektorit publik që kanë dalë në rrugë, ndërsa në disa raste janë regjistruar edhe përplasje me policinë.
Protestat nisën në gjysmën e dytë të shtatorit me nxënësit e shkollave të mesme në Paris, të cilët kundërshtojnë mbipopullimin e klasave, ngarkesën e lartë të punës, cilësinë e materialeve shkollore dhe mungesën e personelit.
Situata u përshkallëzua më 29 shtator, kur sindikatat thirrën në grevë punonjësit e sektorit publik. Ata kërkojnë rritje të pagave dhe më shumë fonde për institucionet publike, ndërsa mobilizimi erdhi vetëm dy ditë përpara prezantimit të planit financiar të qeverisë për vitin 2027.
Më shumë se 170 protesta u zhvilluan në të gjithë Francën. Në Paris, rreth 30 mijë persona, mes tyre rreth 8 mijë zjarrfikës, marshuan në rrugët e kryeqytetit. Sindikata CGT pretendoi shifra më të larta, duke folur për rreth 70 mijë pjesëmarrës në Paris dhe 300 mijë në të gjithë vendin.
Protestat studentore janë shoqëruar edhe me tensione. Rreth 400 institucione arsimore u përfshinë në mobilizime, ndërsa Ministria e Arsimit raportoi bllokimin e rreth 40 institucioneve dhe tentativa për bllokim në 44 të tjera.
Ministri i Brendshëm, Laurent Nuñez, bëri të ditur se 440 persona janë ndaluar, shumica të mitur. Gjatë përplasjeve policia ka përdorur gaz lotsjellës, ndërsa janë raportuar edhe persona të plagosur.
Protestat zhvillohen në një periudhë të vështirë për financat publike franceze, teksa borxhi publik arriti në rreth 3.6 trilionë euro në tremujorin e dytë të vitit 2026, ekuivalent me rreth 119% të Prodhimit të Brendshëm Bruto.
