"Italia është një vend i madh demokratik dhe duhet të ritheksoj, me fjalët e përdorura në një rast tjetër, më 7 tetor 2022, se 'di të kujdeset për veten duke respektuar Kushtetutën e saj'. Kushdo, veçanërisht nëse, siç është lajmëruar, është në prag të marrjes së një roli të rëndësishëm qeveritar në një vend mik dhe aleat, duhet të respektojë sovranitetin e saj dhe nuk mund të marrë përsipër detyrën për t'i dhënë asaj udhëzime." Këtë e deklaroi Presidenti i Republikës, Sergio Mattarella. Referenca është për fjalët e Elon Musk dhe qëndrimin e tij ndaj gjyqtarëve italianë në lidhje me çështjen e riatdhesimeve të emigrantëve nga Shqipëria. Ndërkohë, Elon Musk këmbënguli: "A jeton populli italian në një demokraci apo është një autokraci e pa zgjedhur ajo që merr vendimet?" Edhe shoqatat për mbrojtjen e anëtarëve të sistemit të drejtësisë në Itali, kanë reaguar ashpër duke i përmendur Musk “ashtu siç kërkon të mbrohen kufijtë ndaj emigrantëve të paligjshëm, duhet të ketë kujdes që të mos shkelë kufirin e ndërhyrjes në çështjet e një shtetit tjetër”. Debati i Elon Musk me zyrtarët italianë vjen pas vendimit të Gjykatësit në Romë të cilët kanë refuzuar që të miratojnë ardhjen e një grupi emigrantësh në qendrat në Shqipëri, që operohen nga Italia, duke e dërguar këtë çështje te Gjykata Evropiane e Drejtësisë. Kjo është hera e dytë që gjykata në Romë merr vendim kundër planit të Melonit. Më 18 tetor, gjykatësit kishin refuzuar urdhrat që një grup emigrantësh të mbahej në një qendër të pritjes në Shqipëri, duke thënë se ata kanë të drejtë të dërgohen në Itali.
