Nga Desada Metaj
Protesta e deputetëve të PD në parlament kishte sot nota më të qeta. Përplasjet me Gardën të dy javëve më parë u zëvendësuan nga ulja në shkallët e Kuvendit dhe mbajtja e disa letrave me parrulla në duar. Aq i ulët ishte ritmi i revolucionit, sa hyrje-dalja e ambasadorit të BE Gonzato gati sa nuk u duartrokit nga deputetët jashtë sallës.
Me gjasë “tërheqja e veshit” nga Brukseli, shoqëruar dhe me protesta jo fort të suksesshme popullore, e kanë ulur zellin e përplasjes fizike për ta çuar opozitën parlamentare dalëngadalë në hullitë e normalitetit. Nuk duket e largët dita kur deputetët e saj do të jenë në sallën plenare për të debatuar apo sherrosur me ata të PS-së, duke lënë pas për herë të dytë brenda pak muajve bojkotin dhe duke inhapur rrugë normalitetit.
E ndërkohë që deputetët e PD qëndronin ulur në shkallët e Kuvendit duke protestuar këtë herë në mënyrë gjysmë paqësore, disa të tjerë të larguar zyrtarisht nga PD zhvilluan debat për disa nga temat më shqetësuese për publikun. Agron Shehaj dhe Flutura Açka u përplasën sot me ministren Mirela Kumbaro, Taulant Ballën dhe ministrin e Brendshëm Ervin Hoxha për skandalin e mbetjeve të dyshuara të rrezikshme. Me gjithë justifikimet e ministrave, asnjë prej tyre nuk i dha dot përgjigje pyetjeve të deputetëve që me të drejtë kërkonin shpjegime për arsyet e mosankorimit të anijes në port dhe sekuestrimit të kontejnerëve nga ana e Prokurorisë. Të mësuar me kaosin e kohëve të fundit në parlament, ministrat e Edi Ramës nuk ishin të përgatitur dhe kishin asnjë përgjigje zyrtare apo informuese për këtë çështje me rëndësi. Ata thjesht anashkaluan përgjegjësinë e qeverisë me përgjigje “copy paste” të propagandës dhe me batuta pa asnjë vlerë për të gjithë ata të shqetësuar nga skandali i anijeve me mbetje nisur nga Porti i Durrësit.
Edhe çështja e shkeljes së Kushtetutës nga Elisa Spiropali për mandatin e anëtarit të ri të Gjykatës Kushtetuese mbeti pa përgjigje nga kryetarja e Kuvendit. Deputeti Enkelejd Alibeaj kërkoi shpjegime nga Spiropali, e cila ka vendosur të shkelë ligjin në mënyrë flagrante, e pashqetësuar madje dhe nga PD zyrtare, me të cilën kohët e fundit nuk i kanë munguar “shkeljet e syrit” për marrëveshje të të gjitha llojeve.
Në Kuvend duhej të flitej dhe debatohej sot dhe për ngjarjen e Shkodrës, ku krimi i mbivendoset ligjit dhe shtetit duke vrarë të pafajshëm. Por këtë debat nuk mund ta bëjnë socialistët, sepse janë partia që qeveris, që ka zgjedhur dhe votuar Ministrin e Brendshëm dhe drejtorin e përgjithshëm të policisë. Ndaj më shumë se te shkallët e Kuvendit, deputetët e PD duhet të ishin sot në sallë për të folur e debatuar, kërkuar llogari dhe përgjegjësi jo vetëm për arrestin e Berishës dhe dhe burgun e Salianjit, por për shqetësimet e gjithë shoqërisë. Sepse vendi dhe roli i opozitës është përballë pushtetit. Dhe kur pushteti i korruptuar si ky i Shqipërisë të fut në qorrsokak, drita e vetme për të gjetur rrugëdaljen nuk janë vetëm protestat e dhunshme por është dhe debati apo alternativa. Që së bashku janë të vetmet cilësi që mund të ngjallin shpresë dhe besim tek një shtresë e madhe jopartiake e shoqërisë.
Protesta të përsëritura në formë e përmbajtje, njerëz të konsumuar dhe ish-pushtetarë të korruptuar nuk mund të jenë as alternativë dhe as shans për të bërë diçka më të mirë për shqiptarët. Mekanizma të tillë të vjetëruar mund të të sigurojnë veç një biletë të sigurt në vendet e opozitës në parlament. Dhe këto vende Edi Rama është kujdesur që një pjese të opozitës t’ja ofrojë falas.
