Adaptimi i ri i regjisorit Christopher Nolan, The Odyssey, ka nisur me sukses të jashtëzakonshëm në kinematë botërore, duke arkëtuar 264 milionë dollarë gjatë fundjavës së parë të shfaqjes. Filmi ka regjistruar debutimin më të madh ndërkombëtar në karrierën e Nolan, duke tejkaluar pritshmëritë.
Sipas mediave të huaja, filmi siguroi 124.5 milionë dollarë vetëm në Amerikën e Veriut, duke u renditur si hapja e tretë më e madhe e vitit 2026.
Rezultati konsiderohet edhe më mbresëlënës duke pasur parasysh se The Odyssey është një adaptim i një prej veprave më të njohura të letërsisë antike dhe mban klasifikimin R, i cili kufizon audiencën më të re.
Filmi ka tejkaluar gjithashtu debutimin global të Oppenheimer, i cili në fund arriti të arkëtonte rreth 975 milionë dollarë në mbarë botën.
The Odyssey, që raportohet të ketë kushtuar rreth 250 milionë dollarë, është gjithashtu prodhimi i parë artistik i xhiruar tërësisht me kamera IMAX.
Analistët besojnë se filmi ka potencialin të kalojë shifrën e 1 miliard dollarëve në arkëtimet globale, ndërsa pritet të vazhdojë dominimin në kinema edhe gjatë javëve në vijim.
Edhe kritika e ka pritur pozitivisht filmin, duke vlerësuar ambicien dhe mënyrën moderne me të cilën Nolan ka risjellë historinë e Odiseut. Megjithatë, disa kritikë kanë evidentuar probleme me ritmin dhe montazhin, duke theksuar se filmi arrin kulmin emocional vetëm në aktin e fundit.
