Kryeministri Edi Rama ka akuzuar për herë të parë publikisht regjimin iranian se është pjesë e përpjekjeve për të përhapur narrativa të rreme rreth protestave kundër projektit të investimit në Zvërnec.
Gjatë një deklarate nga Mali i Zi, Rama tha se pas shumë prej pretendimeve që qarkullojnë në rrjetet sociale qëndron ajo që ai e cilësoi si një “luftë hibride” kundër Shqipërisë, duke përmendur konkretisht narrativën sipas së cilës projekti lidhet me një marrëveshje të fshehtë për sjelljen e palestinezëve nga Gaza në vend.
“Sa i përket protestave për resortin, nuk ka kërkesa për t’u diskutuar sepse ende nuk ekziston një projekt i miratuar. Fillimisht duhet të kemi projektin, pastaj ta shohim dhe më pas ta diskutojmë. Nuk mund të diskutojmë për diçka që nuk ekziston, por që po paraqitet në rrjetet sociale përmes një lufte hibride kundër Shqipërisë dhe narrativave të rreme”, tha Rama.
Kreu i qeverisë u shpreh se një nga teoritë që po qarkullon pretendon se projekti nuk është ai që prezantohet publikisht, por një marrëveshje mes tij, kryeministrit izraelit Benjamin Netanyahu dhe Jared Kushner për të sjellë palestinezë në Shqipëri.
Rama tha se kjo narrativë po ushqehet edhe nga aktorë të huaj dhe përmendi Iranin si një nga burimet e dezinformimit.
“Regjimi iranian, i përfshirë prej kohësh në sulme kibernetike kundër vendit tonë, është pjesë e përpjekjeve për të përhapur narrativën se projekti synon sjelljen e palestinezëve nga Gaza në Shqipëri. Kjo narrativë ka marrë shumë vëmendje. Janë shpërndarë video të rreme me qindra mijëra shikime, ku pretendohet se shqiptarët brohorasin ‘Israel go home’. Këto janë të gjitha të rreme. Nuk ka asgjë të tillë në Shqipërinë reale”, deklaroi Rama.
Kryeministri këmbënguli se nuk ekziston ende një projekt i miratuar për t’u gjykuar nga publiku dhe se qëllimi i nismës është zhvillimi i një projekti turistik që, sipas tij, do të realizohet pa dëmtuar natyrën dhe me angazhimin e arkitektëve dhe ekspertëve më të njohur ndërkombëtarë.
