Këshilli i Ministrave ka vendosur që nga 1 janari 2025, zyrat e rivlerësimit të gjyqtarëve të kalojnë nën administrimin e SPAK dhe Ministrisë së Drejtësisë. Ky ndryshim ka ardhur pas mbarimit të mandatit të komisionerëve publikë, Florian Ballhysa dhe Irena Nino, në fund të vitit 2024. Nga ky moment, kryeprokurori i posaçëm, Altin Dumani, do të marrë përgjegjësinë për të përfaqësuar çështjet e apeluara në Komisionin e Pavarur të Apelit.
Ky hap i fundit i Këshillit të Ministrave është një pjesë e reformave të drejtësisë, ku Komisioni i Pavarur i Kualifikimit dhe komisionerët publikë do të shkrihen më 31 dhjetor 2024. Mandati i procesit të vettingut, i cili ka si afat përfundimtar qershorin 2026, ka për qëllim shqyrtimin e të gjithë funksionarëve të lartë në sistemin e drejtësisë.
Gjatë vitit 2024, në shkallën e parë të procesit të vettingut, janë rivlerësuar 805 funksionarë, prej të cilëve 268 nuk janë konfirmuar në detyrë. Aktualisht, janë ende 42 gjyqtarë dhe prokurorë që kanë apeluar vendimet në KPA, ndërkohë që disa nga ata kanë paraqitur ankimime edhe në Gjykatën e Strasburgut. Deri më tani, Gjykata Evropiane e të Drejtave të Njeriut ka marrë vetëm një vendim për rikthimin në detyrë të prokurores Antoneta Sevdari, duke e cilësuar procesin ndaj saj si disproporcion.
