Sekretarja e PD-s italiane shkon në Gjadër për të vëzhguar qendrat e emigrantëve bosh

Sekretarja e Partisë Demokratike të Italisë, Elly Schlein, qëndroi në Shqipëri për të inspektuar nga afër situatën e qendrave të emigrantëve, të cilat ishin financuar nga qeveria italiane, por që aktualisht janë të pabanuara. Schlein, një kundërshtare e fortë e kryeministres italiane, Giorgia Meloni, publikoi një video në Instagram nga një qendër pritjeje për emigrantët në Gjadër. Në këtë video, ajo thekson se qeveria italiane po keqpërdor paratë e taksapaguesve. “Gjadër, Shqipëri. Kjo qendër është ndërtuar nga qeveria Meloni dhe ka kushtuar më shumë se 800 milionë euro nga taksat e italianëve, por aktualisht është plotësisht bosh. Po e shihni me sytë tuaj, dhe është e dhimbshme. Të mendosh që këto para mund të ishin përdorur për të krijuar 50 mijë vende të reja për çerdhe, ose për të paguar 7 mijë mësues dhe 6 mijë infermierë për pesë vite,” tha Schlein në video. Ajo e quajti situatën si një dështim të qeverisë italiane, duke shtuar se kjo është një marrëveshje me Shqipërinë që shkel të drejtat themelore të njerëzve dhe ligjet italiane dhe evropiane. Sipas Schlein, qendra në Gjadër, e cila është bosh, do të mbetet kështu për shkak të një marrëveshjeje që ka ende nevojë për miratimin e Gjykatës Evropiane të Drejtësisë. “Jemi përballë një qendre që është e zbrazët, dhe kjo do të vazhdojë të jetë e tillë për shkak të një marrëveshjeje që ka krijuar shumë polemika dhe që po përballet me një vendim nga Gjykata Evropiane e Drejtësisë. Kjo qendër do të mbetet bosh,” tha ajo. Ky projekt është një pjesë e marrëveshjes ndërmjet kryeministrit italian Giorgia Meloni dhe kryeministrit shqiptar Edi Rama, e cila ka rezultuar në ngritjen e disa qendrave për të strehuar emigrantët, por këto qendra janë përdorur minimalisht, për shkak të një vendimi të Gjykatës së Romës, e cila ka bllokuar mbajtjen e emigrantëve në këto qendra, duke e çuar çështjen në Gjykatën Evropiane të Drejtësisë.  

 

View this post on Instagram

 

A post shared by elly schlein (@ellyesse)