Më pak se 5 muaj para zgjedhjeve të përgjithshme parlamentare, Sali Berisha do të nisë një tjetër betejë ligjore, këtë herë në Strasburg. Në një konferencë për shtyp, ai tha se avokatët e tij po merren me shqyrtimin e mundësisë për në Strasburg për të apeluar vendimin e formës së prerë të Britanisë së Madhe për shpalljen e tij non grata.
“I gjithë ky proces, i cili është i dokumentuar një proces kangur, që diskrediton çdo vend të lirë, kishte një synim që unë të padisja për shpifje siç veprova me sekretarin Blinken. Por problemi ishte se Mbretëria e Bashkuar kishte një gjykatë të veçantë për këtë çështje dhe asgjë nuk merrej nga gjykata e zakonshme pa kaluar në këtë kanal,” tha Berisha, pa përmendur shumën e majme, rreth gjysmë milion euro, që familja e tij pagoi për avokatët në Britaninë e Madhe.
Në kohën kur partia më e madhe në opozitë përgatitet për përballjen elektorale me mazhorancën, një betejë e re ligjore e kryetarit të saj duket qartë si një përdorim i forcës politike për të zgjidhur hallet personale. Tashmë me logo dhe vulë, Sali Berisha po e tërheq zvarrë PD-në drejt betejave ligjore për çështjen e non gratave të tij dhe familjes së tij. Edhe pse fillimisht premtoi se nuk do ta përfshinte PD-në në betejën e tij me Departamentin e Shtetit dhe qeverinë britanike, Sali Berisha nuk e mbajti kurrë këtë premtim.
