Gazment Bardhi ka dalë sot nga radha e heshtjes së deputetëve të opozitës duke mbajtur një qëndrim të qartë për krizën në Gjykatën Kushtetuese. Në seancën e sotme të parlamentit, ai shprehu shqetësimin për përplasjen mbi përfundimin e mandatit të Holta Zaçajt dhe konfliktin që kjo ka sjellë me Gjykatën e Lartë.
“Ne duhet të kemi një seancë urgjente dëgjimore të Kryetares së Gjykatës Kushtetuese dhe atij të Gjykatës së Lartë. Kjo mund ta fusë Shqipërinë në një rrugë ku të kemi disa anëtarë të Kushtetueses, disa që mbajnë zyrën me dhunë, disa të tjerë që zgjidhen nga organet e emërtesës duke sjellë pasoja për shtetin,” – tha zoti Bardhi, duke shënuar qëndrimin e parë zyrtar për këtë çështje.
Në fakt, kriza që po ndodh në Gjykatën Kushtetuese për mandatin e Holta Zaçajt e ka zanafillën te zgjatja e paligjshme e mandatit të anëtares së dorëhequr Elsa Toska. Në bashkëpunim me Elisa Spiropalin, kryetarja e Gjykatës Kushtetuese vendosi të zgjaste mandatin e kandidatit pasardhës nga viti 2025 në 2028, duke e përdorur këtë si precedent për mandatin e saj dhe me gjasë edhe atë të Sonila Bejtes, që mbaron gjithashtu në vitin 2025.
Edhe pse i vonuar, reagimi i kryetarit të grupit parlamentar të PD-së duket i duhur në një kohë kur ende trupa gjykuese e Gjykatës Kushtetuese nuk ka marrë vendim për përfundimin e mandatit të Holta Zaçajt. Ajo që mbetet për t’u parë është nëse ky është një qëndrim personal i zotit Bardhi apo një qëndrim i PD-së, e cila deri më sot ka heshtur përballë kësaj krize kushtetuese. Me gjasë, arsyet e heshtjes, më shumë sesa mosdija, lidhen me interesa të vogla që përfshijnë një anëtare të Gjykatës me lidhje të afërta me Sali Berishën dhe shpuren e tij mediatike.
