Është ndarë nga jeta në moshën 84-vjeçare aktori i njohur i kinematografisë dhe teatrit shqiptar, Birçe Hasko.
Hasko u bë i njohur për interpretimet e tij të spikatura në role të karakterit popullor, veçanërisht atij të jugut.
I lindur në Dukat të Vlorës më 15 mars 1942, ai përfundoi shkollën pedagogjike “Jani Minga” dhe për disa vite punoi si mësues dhe drejtues shkolle në zona të ndryshme të jugut të vendit. Më pas ndoqi studimet për aktor në Institutin e Lartë të Arteve në Tiranë.
Pas diplomimit, Hasko iu përkushtua edhe mësimdhënies, duke shërbyer si pedagog në Akademinë e Arteve, ku më vonë mbajti edhe detyrën e dekanit të Fakultetit të Artit Skenik.
Në teatër, ai interpretoi një sërë rolesh të njohura në vepra si “Shi në plazh”, “Shtëpia me dy porta” dhe “Familja e peshkatarit”, duke u konsideruar një nga emrat më të rëndësishëm të aktrimit shqiptar.
