Pas ditësh heshtjeje, ankthi dhe videosh nga ndalimi i flotiljes “Global Sumud”, Ministria e Jashtme shqiptare njoftoi sot me krenari se Baki Goxhaj është rrugës për në atdhe dhe se institucionet shqiptare “kanë ndjekur pa ndërprerje çështjen”.
Në fakt, shqiptarët e mësuan për fatin e aktivistit fillimisht nga videot e publikuara në rrjet, nga bashkëudhëtarët e tij dhe nga mediat e huaja, ndërsa reagimi institucional erdhi pasi anija ishte ndaluar, aktivistët ishin shfaqur të prangosur dhe skandali kishte marrë jehonë ndërkombëtare.
Por tani, sipas ministrit, gjithçka rezulton një histori suksesi diplomatik dhe “dëshmi e përkushtimit të Shërbimit të Jashtëm shqiptar”.
Njësoj si gjithmonë: shteti mungon kur ndodh kriza dhe shfaqet në fund për konferencën e meritave.
Megjithatë, lajmi më i rëndësishëm mbetet se Baki Goxhaj po kthehet shëndoshë e mirë në Shqipëri.
