Aktivisti shqiptar Baki Goxhaj ka mbërritur në Turqi, pas ndalimit të flotiljes humanitare “Sumud” nga forcat izraelite në ujërat ndërkombëtare.
Lajmi është konfirmuar për VNA nga bashkëshortja e tij, Eriselda Balliu, e cila ka komunikuar me video call me Goxhajn vetëm pak minuta më parë.
Sipas saj, aktivisti shqiptar ka deklaruar se është keqtrajtuar nga forcat ushtarake izraelite gjatë ndërhyrjes dhe ndalimit të flotiljes, ndërsa më rëndë kanë pësuar disa prej bashkëudhëtarëve të tij, përfshirë edhe kapitenen e anijes me të cilën po lundronin drejt Gazës në përpjekje për të çarë bllokadën humanitare.
Ende nuk ka një bilanc të plotë mbi gjendjen e të gjithë aktivistëve të ndaluar, ndërsa shumë prej tyre, sipas raportimeve ndërkombëtare, kanë denoncuar dhunë fizike, poshtërime dhe trajtim çnjerëzor gjatë operacionit të forcave izraelite.
Mbërritja e Goxhajt në Turqi i jep fund përkohësisht ankthit për fatin e tij, por njëkohësisht hap shumë pyetje mbi mënyrën se si u trajtuan dhjetëra aktivistë civilë që ndodheshin në një mision humanitar drejt Gazës.
