Një valë e jashtëzakonshme solidariteti ka sjellë shpresë për Elion, djalin 4-vjeçar francez që vuan nga një formë e rrallë leuçemie. Pas muajsh apelesh në rrjetet sociale, familja ka njoftuar se është gjetur një dhurues i përshtatshëm i palcës kockore.
“Është një lehtësim i jashtëzakonshëm. Nëse sot Elio ka këtë mundësi, është falë solidaritetit anonim dhe magjisë së dhurimit”, thanë prindërit e tij, Thomas dhe Juliette.
Historia e Elios preku mijëra njerëz në Francë dhe më gjerë. Një ditë ai ishte në shkollë, të nesërmen në terapi intensive. Prindërit zbuluan se i vetmi shans për ta shpëtuar ishte transplanti i palcës, por asnjëri prej tyre nuk rezultoi kompatibël.
Apeli i tyre u shpërnda masivisht në rrjete sociale dhe solli një rritje të jashtëzakonshme të regjistrimeve si dhurues. Vetëm në javët e fundit, rreth 70 mijë persona u regjistruan për të dhuruar palcë kockore.
Edhe pse tashmë është gjetur një dhurues për Elion, familja u ka bërë thirrje njerëzve të vazhdojnë të regjistrohen, pasi “ka ende shumë familje që presin telefonatën që mund t’u shpëtojë jetën”.
