Aktivisti shqiptar Baki Goxhaj pritet të largohet në orët në vijim nga territori i Izraelit, pasi autoritetet izraelite kanë përfunduar procedurat e dëbimit ndaj tij.
Lajmi bëhet i ditur nga organizata ligjore izraelite “Adalah”, e cila po ndjek çështjen e aktivistëve të ndaluar gjatë misionit humanitar drejt Gazës.
Sipas burimeve të kësaj organizate, Goxhaj do të deportohet së bashku me dhjetëra aktivistë të tjerë të flotiljes, të cilët u ndaluan nga autoritetet izraelite pasi anijet e misionit humanitar u interceptuan në ujërat ndërkombëtare.
Burimet bëjnë me dije se largimi do të kryhet me rrugë ajrore dhe destinacioni i parë i grupit pritet të jetë Turqia.
Goxhaj ishte pjesë e misionit ndërkombëtar humanitar për Gazën, ku aktivistë nga vende të ndryshme europiane synonin të dërgonin ndihma dhe të sfidonin bllokadën ndaj territorit palestinez.
Ndalimi i aktivistëve ka shkaktuar reagime ndërkombëtare dhe tension diplomatik në disa vende europiane, ndërsa në Shqipëri çështja u ngrit sot edhe në Kuvend nga deputeti Redi Muçi, i cili kritikoi heshtjen e qeverisë shqiptare për rastin e shtetasit shqiptar.
