Kreu i Grupit Parlamentar të Partisë Demokratike, Gazment Bardhi, ka reaguar ndaj deklaratave të Kryeministrit Edi Rama lidhur me procesin e integrimit europian të Shqipërisë, duke e akuzuar atë si pengesën kryesore në rrugën drejt Bashkimit Europian.
Në një deklaratë publike, Bardhi u shpreh se “ka vetëm një gjë që e ndal Shqipërinë europiane”, duke e lidhur këtë me qeverisjen aktuale dhe sipas tij problemet e korrupsionit dhe funksionimit të institucioneve.
Ai pretendon se Bashkimi Europian ka vendosur 34 kushte për Shqipërinë në kuadër të negociatave për Grupkapitullin e Themeloreve, të cilat sipas tij lidhen me korrupsionin, procesin zgjedhor dhe standardet e funksionimit të institucioneve.
Sipas Bardhit, në dokumentet e procesit të integrimit, BE ka shprehur shqetësime për vendime të Parlamentit dhe ka kërkuar respektimin e standardeve për imunitetin, funksionimin e komisioneve hetimore dhe zbatimin e vendimeve të Gjykatës Kushtetuese.
Ai shton gjithashtu se korrupsioni është cilësuar si një “shqetësim vendimtar” në procesin e integrimit dhe se, sipas tij, zgjedhjet në Shqipëri nuk kanë përmbushur plotësisht standardet e OSBE/ODIHR.
Bardhi thekson se përmbyllja e negociatave të Shqipërisë në European Union nuk mund të arrihet pa adresuar këto çështje, duke akuzuar qeverinë si përgjegjëse për ngecjet në proces.
