Kryeministri Edi Rama deklaroi se Shqipëria do të vazhdojë pa pengesa procesin e integrimit në Bashkimin Europian, duke theksuar se më 26 maj në Tiranë do të mbahet Konferenca Ndërqeveritare.
Në podcastin "Flasim", Rama ka kritikuar ashpër opozitën, duke e akuzuar për skepticizëm dhe përhapje të narrativave negative lidhur me rrugën e vendit drejt BE-së.
“U lëshuan në një ofensivë të dëshpëruar… për ta dëmtuar Shqipërinë në sytë e botës… thanë se rruga europiane ishte e bllokuar,” u shpreh Rama, duke iu referuar deklarimeve të opozitës.
Ai shtoi se, pavarësisht kritikave politike, procesi i integrimit po vijon dhe Shqipëria ka marrë mbështetje ndërkombëtare për hapat e saj drejt anëtarësimit në BE.
“U lëshuan rrugëve për ta djegur Shqipërinë në sytë e botës… fotot e molotovëve që hidheshin në Tiranë bënin xhirot e botës,” u shpreh kryeministri, duke kritikuar ashpër opozitën për mënyrën e zhvillimit të protestave.
Rama theksoi gjithashtu se vendi ka “ngjitur një lartësi të vështirë” në rrugën drejt Bashkimit Europian dhe se procesi do të vijojë deri në anëtarësim të plotë.
