"Mirëmbrëma yje" është emisioni i ri i Arbana Osmanit, i shfaqur mbrëmë në kanalin e saj në YouTube, i cili ka arritur rekorde shikueshmërie. Thënë ndryshe, Arbana e ka fituar “garën” e saj me TCH, televizionin ku punoi për shumë vite dhe arriti rekorde audience me programet Big Brother dhe Big Brother VIP. Në këtë kontekst, Arbana Osmani e tregoi veten si një profesioniste të zonjën për të tërhequr audiencë. Por pyetja që lind është: a përçoi ajo me këtë format diçka me vlerë për shikuesit? A ishte programi i saj një qasje e re televizive apo thjesht një garë dhe “inat” me TCH?
Po ta analizosh me kujdes, në programin e parë, i vetmi lajm që qarkulloi ishte ai i arsyeve të divorcit të këngëtarit Ledri Vula. Thënë ndryshe, një thashethem që Arbana e konfirmoi në programin e saj. Por çfarë interesi ka publiku për jetën private të Ledri Vulës? A është kjo një mënyrë për të kënaqur audiencën me thashetheme, duke iu shmangur të vërtetave që shqetësojnë artin shqiptar? A mos ndoshta artistët duhet, përtej detajeve të jetës private, të flasin për nivelin e artit që përçojnë? Për mënyrën se si ky art orienton shijet e publikut, sidomos të të rinjve? Për ndikimin e politikës në art dhe anasjelltas, duke treguar se vlerat po zbehen dhe se edukimi ndoshta nuk është misioni i parë i medias?
Megjithatë, është detyrë funksionale e atyre që, në emër të klikimeve dhe audiencës, mbajnë mbi supe përgjegjësinë që të paktën të orientojnë shijet dhe edukatën e publikut. Sepse mund të fitosh garën e klikimeve, por në atë të vlerave nuk dallon shumë nga emisioni “Për’puthen”.
