Dhjetëra banorë nga fshatrat Suk 1, Suk 2, Arapaj, Jagodinë dhe Strum në Roskovec zhvilluan sot një protestë të ashpër kundër ndërtimit të një termocentrali të ri me kapacitet 170 MW, i cili është miratuar nga zv.kryeministrja dhe ministrja e Energjisë, Belinda Balluku.
Projekti parashikon prodhimin e energjisë elektrike përmes djegies së gazit, por banorët shprehin shqetësime serioze për ndikimin negativ në mjedis dhe shëndetin e tyre. Ata pretendojnë se ndërtimi i termocentralit do të dëmtojë prodhimet bujqësore, sidomos në zonën që numëron rreth 750 hektarë sera, si dhe do të rrezikojë cilësinë e jetës.
“Ky projekt nuk përfaqëson të ardhmen për fëmijët tanë”, u shprehën protestuesit, duke theksuar se nuk do të ndalen në përpjekjet për të ndaluar ndërtimin e TEC-it. Në shenjë revolte, ata i vunë flakën një shtylle betoni të vendosur për piketim.
Banorët e cilësuan arrogancë nga ana e mazhorancës mosdëgjimin e kundërshtimeve të tyre dhe paralajmëruan se do ta çojnë çështjen deri në Parlamentin Europian.
Projekti, sipas një vendimi të Këshillit të Ministrave, parashikon që termocentrali të ndërtohet dhe të vihet në operim brenda 36 muajsh nga hyrja në fuqi e vendimit, me një periudhë shfrytëzimi 49-vjeçare.
