Kryeministri Edi Rama po feston Krishtlindjen e 12-të si kryeministër i Shqipërisë dhe ka shumë mundësi që të festojë edhe 4 të tjera, duke parë situatën politike aktuale, me një opozitë të përçarë dhe udhëheqës me karierë 34-vjeçare, mbeten në krye të saj. Për të bërë një analizë të saktë të arsyes se pse Rama është në pushtet për tre mandate dhe ka shanse për të katërtin, është e vështirë të thuhet nëse është për shkak të aftësive të tij ose për shkak të kundërshtarëve të dobët. Megjithatë, e sigurt është që një faktor kyç në qëndrimin e tij në pushtet është opozita, që duke mos qenë një alternativë serioze, ka kontribuar dukshëm në forcimin e pushtetit të Ramës.
Opozita jo vetëm që ka lejuar që pushteti i Ramës të ruajë stabilitetin gjatë këtyre 12 viteve, por i ka dhënë atij luksin për të ironizuar dhe për t’u tallur me të. Kjo u pa qartë edhe në fjalën që ai mbajti mbrëmjen e sotme në darkën e fundvitit me trupin diplomatik të akredituar në Shqipëri. Në fjalën e tij, ai theksoi se fitoret e tij nuk vijnë vetëm nga dobësia e opozitës, por edhe nga "opozita e fortë" që ka në shtëpi, duke iu referuar bashkëshortes së tij, Lindës.
“Më lejoni ta mbyll me diçka të veçantë që thuhet lartëposhtë: 'Ai fiton, sepse opozita është e dobët.' Më lini t’ju them se kjo është një gjysmë e vërtetë, pra një gënjeshtër e madhe, sepse, si burrë, isha i bekuar kur Linda ra dakord të martohej me mua. Dhe si pasojë e këtij bekimi, ndodhi që u bëra kryeministër me të në krah, që do të thotë, me opozitën më të ashpër në shtëpi! Pra, nëse ka një arsye kryesore për fitoret e mia, është se jam jo vetëm i stërvitur mirë, por gjithashtu përballë opozitës më të ashpër dhe më të mirëpërgatitur" – tha Rama.
Ironia e Ramës mund të ketë një dozë të vërtetës, pasi vetëm ai mund ta bëjë këtë krahasim për shkak të marrëdhënieve të tij me të dyja "opozitat". Por, pse vallë opozita e Linda Ramës është më e fortë se ajo e Sali Berishës? Opozitën e Lindës nuk e analizojmë dot, por këtë të Sali Berishës po. Me gjasë kjo e dyta i përshtatet më shumë egos së tij. Ai dëshiron figura si "non grata" ose të konsumuar, që të qëndrojnë në krye të opozitës, sepse kjo garanton ruajtjen e pushtetit për të, dhe kështu ndodh. Ai gjithashtu dëshiron që kodi zgjedhor të mos ndryshojë, dhe opozita ia siguron këtë. Rama është kundër listave të hapura, dhe po ashtu, kjo opozitë është përkrahësja e kësaj ideje. Ai do që miqtë e tij oligarkë t’i qerasë me fonde publike dhe pushtetin ta ndaj me ta pa i shqetësuar njeri, dhe këtë kush më mirë se opozita që ka përball e bën?
Prandaj Rama këtë opozitë që ka as në ëndrrat e tij më të mira nuk do ta kishte menduar. Prandaj, ai sot doli para ambasadorëve që janë të shqetësuar për opozitën e vendit, për t’u thënë që mos të shqetësohen për këtë pjesë, se ai ka opozitë shumë të fortë dhe ajo është Linda Rama. Me këtë rast, ngriti dhe dollinë e 4 Krishtlindjeve të tjera që e presin si kryeministër të Shqipërië.
