Nënkryetari i Kuvendit dhe deputeti i PD-së, Agron Gjekmarkaj, ka reaguar pas incidentit të ndodhur gjatë protestës, ku ai humbi ndjenjat. Gjekmarkaj sqaron se shkaku i kësaj gjendjeje nuk ishte një problem shëndetësor, por dhuna e ushtruar nga efektivët e policisë.
Ai tregon se, edhe pse u identifikua si deputet dhe nënkryetar i Kuvendit, policia e shtyu me forcë dhe e trajtoi brutalisht, duke e rrethuar dhe shtyrë deri në atë pikë sa i ishte vështirësuar frymëmarrja.
“Nuk do të kisha reaguar për atë që ndodhi dje, nëse policia e shtetit nuk do të më fyente sërish me deklaratën e saj publike dhe dezinformuese! Nuk kërkoj viktimizim dhe kurrë në jetën time nuk kam nxitur ballafaqime fizike. Dje, thjesht jam mbrojtur. Ishte dhuna e policisë ajo që më detyroi të largohesha nga protesta, jo dëshira ime. Më ngritën në ajër dhe vetëm falë ndihmës së shoqëruesit tim dhe një protestuesi nga Lezha arrita të dilja nga turma. Por, sapo u largova, humba ndjenjat,” deklaroi ai.
Gjekmarkaj tha se është ndjerë i tronditur nga “egërsia në shikimet e disa prej policëve”, të cilët, sipas tij, kanë vepruar nën një urdhër politik.
Ai përfundoi duke falënderuar të gjithë ata që i dolën në ndihmë, përfshirë protestuesit, qytetarët e Lezhës, mjekët e spitaleve dhe miqtë që e kanë mbështetur me mesazhe pas ngjarjes.
