“Tirana ishte sot më e lirë se kurrë” - kështu deklaroi Berisha në fund të protestës së opizitës, e cila nuk zgjati më shumë se 3 orë aq sa ishte marrë dhe leja.
Sa i përketë tubimit, nuk kishte ndryshim të madh nga ato të mëparshmet, ku mbështetësit e opozitës u vendosën në 5 nyjet kryesore rrugore të kryeqytetit duke paralizuar qarkullimin. Pikat që u bllokuan ishin rrethrrotullimi i Zogut të Zi, Pallatit me Shigjeta, sheshi Ëillson, kryqëzimi i Rrugës së Elbasanit dhe segmenti ndërmjet ministrive dhe Bashkisë së Tiranës.
Në protestën e sotme u shënuan përplasje mes policisë dhe deputetëve të opozitës. Shtyrje mes policisë dhe protestuesve pati kryesisht në Zogun e Zi, në sheshin Ëillson, si dhe në rrugën e Elbasanit.
Pas përplasjeve me forcat e rendit janë shoqëruar disa protestues ndërkohë qe dhe deputetë të opozitës kanë denoncuar dhunën e policisë ndaj tyre. Si pasojë Agron Gjekmarkaj ka humbur ndjenjat për disa minuta dhe që më pas është transportuar në spitalin e Traumës, ndërsa Xhelal Mziu është gjakosur në dorë nga përplasja me policinë.
Protesta e sotme siç pritej shkaktoi kaos në trafikun e Tiranës. Siç edhe e kishin paralajmëruar në media, organizatorët e mbyllën në orën 20:00.
Kjo protestë gjithashtu ishte e para për Sali Berishën, pasi prej gati 10 muajsh ai ishte në arrest shtëpie. Kreu i PD-së, dha mesazhin e tij se nuk do të ndalen deri në arritjen e objektivave kryesore, qeveri teknike dhe zgjedhje të lira.
“Asgjë nuk i pengon demokratët për të realizuar objektivat e tyre. Sot një nga ditët më të veçanta të dhjetorit, por sot është përsëri dita e demokrateve. Ja ku jemi në detyrë, në protestë, revoltë, në mosbindje Ky dimër premton të jetë i vështirë, si për argatin e Tiranës edhe për padronin në Beograd. Përgatitemi për vitin që vjen për largimin e kësaj qeveria dhe krijimin e qeverisë teknike” – tha Berisha
