Spanja po përgatitet për një nga ngjarjet astronomike më të mëdha të viteve të fundit. Më 12 gusht, një eklips total i Diellit do të përshkojë pjesën veriore të vendit, duke sjellë miliona vizitorë në zonat ku Hëna do ta mbulojë plotësisht Diellin. Por spektakli qiellor po shoqërohet nga një shqetësim serioz në tokë: rreziku i zjarreve.
Autoritetet presin deri në 6 milionë njerëz përgjatë trajektores së eklipsit. Për të menaxhuar fluksin janë përcaktuar 660 zona zyrtare vëzhgimi dhe do të angazhohen më shumë se 35 mijë efektivë të sigurisë. Një qendër kombëtare kontrolli në Madrid do të koordinojë operacionet.
Problemi është se eklipsi përkon me temperatura që në disa zona mund të arrijnë rreth 40 gradë Celsius dhe me një sezon veçanërisht të rëndë zjarresh. Rreth 200 mijë hektarë janë djegur në Spanjë këtë vit, rreth gjashtë herë më shumë se në të njëjtën periudhë të vitit 2025.
Autoritetet druhen se një cigare e hedhur, një automjet i parkuar mbi bar të thatë apo grumbullimet në zona pyjore mund të shkaktojnë vatra të reja. Disa bashki kanë anuluar aktivitetet e planifikuara pranë pyjeve.
Interesi, megjithatë, mbetet i jashtëzakonshëm. Rreth 70% e flotës së kamperëve në Spanjë është rezervuar, ndërsa kërkimet për akomodim në Asturias dhe zona të tjera të totalitetit janë rritur ndjeshëm.
Eklipsi do të kalojë fillimisht mbi Siberinë veriore, Groenlandën dhe Islandën, përpara se të arrijë në Spanjë. Në qytete si A Coruña dhe Bilbao, totaliteti do të ndodhë pak para perëndimit të Diellit.
Kështu, një nga netët më të shumëpritura nga astronomët po shndërrohet njëkohësisht në një nga operacionet më të mëdha të sigurisë së verës në Spanjë.
