Izraeli u ka kërkuar qytetarëve të tij që ndodhen në Greqi të tregojnë kujdes të shtuar, për shkak të dhjetëra protestave pro-palestineze të organizuara në të gjithë vendin, përfshirë zona turistike të frekuentuara nga izraelitët.
Sipas Haaretz, Ministria e Jashtme izraelite u ka rekomanduar qytetarëve të shmangin demonstratat dhe përplasjet politike, si dhe të mos ekspozojnë publikisht simbole izraelite apo hebraike.
Paralajmërimi vjen ndërsa në Greqi janë organizuar dhjetëra tubime kundër luftës në Gaza, me protesta edhe në destinacione turistike.
Tensionet janë rritur gjatë javëve të fundit edhe për shkak të protestave kundër pranisë së turistëve izraelitë. Në korrik, demonstruesit në ishullin Syros bllokuan ankorimin e anijes turistike izraelite Crown Iris, me rreth 1,600 pasagjerë, duke bërë që ajo të ndryshonte destinacion. Protesta pati më pas edhe gjatë ndalesës së anijes në Rodos.
Autoritetet izraelite u kanë kërkuar gjithashtu turistëve të qëndrojnë vigjilentë në vende të mbipopulluara dhe të mbajnë familjarët të informuar për vendndodhjen e tyre.
