Deputeti ukrainas Oleksiy Goncharenko ka reaguar ndaj qëndrimit të presidentit Volodymyr Zelensky për Kosovën, duke e cilësuar si një “gabim diplomatik” mosndryshimin e pozicionit të Ukrainës ndaj pavarësisë së saj.
Reagimi i Goncharenkos erdhi pas deklaratës së Zelenskyt në Beograd, ku presidenti ukrainas rikonfirmoi se Kievi nuk ka ndryshuar qëndrimin lidhur me Kosovën.
Goncharenko, i cili më herët ka iniciuar në Parlamentin e Ukrainës një projektligj për njohjen e pavarësisë së Kosovës, kundërshtoi publikisht këtë linjë të politikës së jashtme ukrainase.
Në një postim në rrjetin social X, deputeti publikoi edhe një fotografi ku shihet heqja e sloganit “Free Ukraine” nga “Hotel Grand” në Prishtinë, duke e lidhur këtë veprim me deklaratat e fundit të presidentit ukrainas.
Sipas Goncharenkos, qëndrimi i shprehur nga Zelensky nuk përfaqëson mbështetjen që, sipas tij, ekziston mes ukrainasve për Kosovën.
“Ukrainasit mbështesin pavarësinë e Kosovës dhe besojmë se Ukraina duhet ta njohë shtetin. Unë do të vazhdoj të luftoj për pavarësinë e Kosovës dhe përfundimisht Ukraina do ta njohë atë”, shkroi Goncharenko.
Deputeti ukrainas ka qenë një prej zërave më të fortë në Kiev në favor të njohjes së Kosovës dhe ka kërkuar disa herë që autoritetet ukrainase të rishikojnë politikën e tyre ndaj Prishtinës.
Ukraina aktualisht nuk e njeh pavarësinë e Kosovës, ndërsa Goncharenko ka bërë të qartë se do të vazhdojë përpjekjet politike dhe parlamentare për ndryshimin e këtij qëndrimi.
