Pak ditë pasi Edi Rama paralajmëroi publikisht se kush flet kundër qeverisë mund të përjashtohet nga Partia Socialiste, duket se Elisa Spiropali ka zgjedhur të rikthehet te versioni më klasik i socialistit të bindur: Europa, vizioni dhe asnjë kritikë për qeverinë.
Në një reagim të gjatë në rrjetet sociale, një ditë para konferencës ndërqeveritare me Bashkimin Europian, Spiropali foli për rëndësinë historike të integrimit, për “guximin politik”, “qartësinë”, “vizionin” dhe “Shqipërinë europiane”.
Por në status mungonte diçka që deri pak kohë më parë dukej se ishte kthyer në pjesë të profilit të saj publik: kritikat ndaj mënyrës së qeverisjes, problemeve të administratës dhe deformimeve të pushtetit që vetë ajo kishte artikuluar në reagime të mëparshme.
Mesa duket, pas mesazhit të fundit të Ramës për disiplinë politike dhe kufijtë e kritikës brenda PS-së, Spiropali ka vendosur të heqë dorë nga tonaliteti kritik dhe të rikthehet në origjinalitetin tradicional të politikës shqiptare: servilizmin e paketuar me fjalor europian.
Në statusin e saj, Spiropali shkruan se “anëtarësimi në Bashkimin Europian nuk është vetëm pasaportë europiane”, por hyrje në një hapësirë ku “ligji, konkurrenca, liria dhe dinjiteti i qytetarit kanë një tjetër peshë”.
Megjithatë, në një tekst të gjatë për Europën, drejtësinë dhe standardet, nuk kishte asnjë reflektim për mënyrën si funksionojnë aktualisht këto standarde në Shqipëri dhe asnjë referencë për problemet e qeverisjes që Elisa dukej ti kishte merak deri para pak javësh ndërsa mendon se ndoshta janë zgjidhur për sa kohë nuk i përmend më. Ose i bën servilizmin e zakonshëm shefit të madh.
