Konflikti i ashpër për kontrollin dhe punimet në Aeroportin Ndërkombëtar të Vlorës ka njohur një tjetër valë tensionesh. Përmes një deklarate të fortë publike, biznesmeni dhe investitori kryesor i projektit, Behgjet Pacolli, ka denoncuar publikisht bllokimin e punëtorëve në kantier, duke e cilësuar situatën si një "pengmarrje" të terminalit dhe privim të të drejtave elementare të pronës.
Pacolli hodhi akuza të rënda se brenda hapësirave të bllokuara po ndodhin vjedhje të dëmshme për projektin qindra-milionësh.
"Edhe sot po vazhdon e njëjta skenë: njerëzve u mohohet qasja në punishtë, në sendet e tyre private, në pajisjet dhe instrumentet e punës, ndërsa Terminali vazhdon të mbahet peng. Tashmë kemi dëshmi serioze se kompjuterë dhe instrumente sensitive po vidhen nga grupe që kanë uzurpuar hapësirat," deklaroi Pacolli, duke shtuar se këto veprime po ndodhin "para syve të Policisë së Shtetit", e cila sipas tij po pengon qasjen në punë.
Sfondi i Konfliktit
Përplasja në kantierin e Aeroportit të Vlorës ka nisur zyrtarisht më 14 maj 2026, kur shoqëria koncesionare "Vlora International Airport" (VIA) – e menaxhuar nga administratori Vegim Hoxha dhe e mbështetur nga ortaku tjetër, Valon Ademi – i nisi një njoftim zyrtar kompanisë së Pacollit, "Mabco Constructions", për ndërprerjen e menjëhershme të kontratës.
Sipas njoftimit të VIA-s, vendimi erdhi si pasojë e:
Vonesave të stërgjata: Punimet e kontraktuara duhej të përfundonin që më 3 shkurt 2025.
Dëmeve financiare: VIA pretendon se shkelja e afateve i ka shkaktuar kompanisë një dëm prej mbi 4.6 milionë eurosh, me një penalitet penalizues prej 10,000 eurosh për çdo ditë vonese.
Nga ana tjetër, pala e Pacollit dhe kompania "Mabco" (e cila zotëron pjesën dërrmuese të kuotave të koncesionit) e konsiderojnë këtë vendim si krejtësisht të paligjshëm dhe "vetëgjyqësi të pastër kriminale". Sipas përfaqësuesve të Mabco-s, nuk ka asnjë vendim gjykate që ndalon hyrjen fizike të punëtorëve apo inxhinierëve të tyre në kantier, pasi vendimet e fundit gjyqësore lidhen vetëm me pezullimin e përkohshëm të të drejtës së votës brenda shoqërisë (çështje që ndodhet aktualisht në Gjykatën e Lartë).
Deklarata e plotë...
Prapë pengesa, prapë bllokada, prapë privim i njerëzve nga e drejta elementare për të punuar, per te pasur qasje në pronën e tyre!
Edhe sot po vazhdon e njëjta skenë: njerëzve u mohohet qasja në punishtë, në sendet e tyre private, në pajisjet dhe instrumentet e punës, ndërsa Terminali vazhdon të mbahet peng.
Tashmë kemi dëshmi serioze se kompjuterë dhe instrumente sensitive po vidhen nga grupe që kanë uzurpuar hapësirat ku ndodhen pajisjet e ndijëshme, pajsjet të mjeshtërve, inxhinierëve dhe punëtorëve. Këto gjëra kanë mbetur pa asnjë përkujdesje, kanë mbetur në mëshirën e atyre që po mbajnë peng një vepër ku investitori Mabco ka investuar qindra miliona euro.
E gjithë kjo po ndodh para syve të Policisë së Shtetit, e cila po pengon qasjen në punë, tash e sa ditë.
Pyetja është e thjeshtë dhe kërkon përgjigje të qartë: kush i ka urdhëruar këto veprime dhe kush po e mban peng këtë proces?
Nëse në këtë vend ka drejtësi, kjo situatë duhet të hetohet menjëherë. Heshtja përballë bllokadës, vjedhjes dhe privimit të pronës nuk është zgjidhje — është përgjegjësi.
