Dy ditë pasi u rikonfirmua në krye të Partisë Demokratike në një garë pa rivalë, Sali Berisha doli para Kryeministrisë për të shpallur votimin e 23 majit si “referendum madhështor” dhe si një goditje ndaj Edi Ramës.
Berisha falënderoi 40 mijë demokratët që morën pjesë në votim, duke e cilësuar procesin si “gjigant të vullnetit të njerëzve të lirë”, ndërsa akuzoi qeverinë se kishte ushtruar “terrorizëm psikologjik tremujor” ndaj demokratëve dhe se kishte tentuar të infiltronte njerëz të lidhur me organizata kriminale në PD.
Ironia politike është se fjala “referendum” u përdor për një proces ku rezultati ishte i njohur paraprakisht dhe ku vetë Berisha garonte i vetëm për kreun e partisë që drejton prej dekadash.
Në të njëjtin fjalim, Berisha sulmoi ashpër Ramën për mungesën e zgjedhjeve në PS dhe për trashëgiminë komuniste, duke e quajtur “pasardhës xhelatësh” dhe “bastard politik”. Ai akuzoi kryeministrin se mbron ende figurën e të atit, Kristaq Rama, dhe se ka rikthyer “moralin e etërve të tij” në qeverisje.
Ndërkohë, nga podiumi i protestës, Berisha paraqiti votimin e 23 majit si dëshmi se opozita “nuk nënshtrohet”, edhe pse pjesëmarrja reale prej rreth 40 mijë votuesish u interpretua nga kritikët si tregues i krizës së thellë të përfaqësimit dhe konsumimit të modelit të lidershipit në PD
