Kreu i PD-së, Sali Berisha, ka identifikuar mediat si shkakun që, sipas tij, po pengon aksionin e “kilometrit të fundit” të opozitës. Në deklaratën e sotme, Berisha prezantoi një raport të hartuar nga PD-ja, ku pasqyrohej mbulimi mediatik që katër televizionet më të mëdha kombëtare i bëjnë mazhorancës dhe opozitës.
Ai tha se, sipas analizës së kohës së transmetimit, Top Channel, Klan dhe RTSH i japin mbi 90% të hapësirës qeverisë, ndërsa opozita trajtohet në mënyrë minimale ose të kufizuar.
“Siç e shihni, 80% e kohës në lajme është e qeverisë dhe vetëm 20.3% e opozitës. Raporti është i kësaj jave, 1 me 4. Është një akt i shëmtuar, për të mos thënë se e përmirëson pak Vizion Plusin, sepse po ta heqësh Vizion Plusin, këto të treja, Top Channel, Klan dhe RTSH, dalin mbi 90% ‘rroftë Edi Rama’ dhe poshtë opozita”, tha Berisha.
Ai i cilësoi mediat si “mamuthë mediatikë që ushqehen me paratë e taksapaguesve shqiptarë”, ndërsa i akuzoi për censurë ndaj opozitës dhe shërbim ndaj “narko-qeverisë”.
Risia në deklaratën e Berishës është përmendja e Klan TV-së, një televizion që më herët ka pasur raporte të mira me kryedemokratin, ndërsa ky i fundit nuk e kishte përfshirë më parë në sulmet e tij ndaj mediave. Megjithatë, duket se raportet mes tyre kanë ndryshuar.
Lufta ndaj mediave duket se shërben si një tjetër arsye me të cilën Berisha kërkon të justifikojë dështimin e protestave, të cilat, përveç episodeve duke hedhur molotovë, nuk kanë arritur të shqetësojnë pushtetin e Edi Ramës.
