Rreth orës 10.30 të ditës së sotme me një vendim të prokurores Antoneta Sevdari, oficerët e Policisë vendosën sekuestro mbi kompanitë Micro Credit Albania dhe Final, të cilat përmes një skeme te mirëorganizuar mashtrimi me mikrokreditë zhvatën mijëra qytetarë shqiptarë.
Ndaj personit juridik, Micro Credit Albania rëndojnë dyshimet për akuzën e “Mashtrimit me pasoja të rënda dhe kryer më shumë se një herë dhe në bashkëpunim”, ndërsa mbi “Final” akuzat e “Mashtrimit me pasoja të rënda dhe kryer më shumë se një herë dhe në bashkëpunim” dhe “Pastrimit të produkteve të veprës penale apo veprimtarisë Kriminale” të kryer në bashkëpunim.
“Nga hetmet, rezultoi se shoqëritë tregtare MCA dhe Final, në bashkëpunim me Shoqërinë ADCA dhe me disa shoqëri të tjera përmbarimore, por edhe me ndihmën e një eksperte vlerësuese, duke pasur që në fillim të ushtrimit të aktivitetet të tyre (aktivitetit të blerjes dhe mbledhjes së kredive të këqija) mendimin unik kriminal, kanë krijuar së bashku një skemë mashtruese me qëllim vjedhjen dhe zhvatjen e qytetarëve që aktualisht përllogaritet në miliona Euro”, theksoi prokurorisë. Nga hetimi rezultoi se në mënyrë abuzive shoqëritë dhe personat nën hetim kanë përdorur të dhënat personale të siguruara në mënyrë të paligjshme të individëve/debitorëve pa asnjë mundësi për përballimin e jetesës së përditshme. Ata kanë përdorur numrat e telefonit, të vetat apo të familjarëve dhe të dhëna të gjendjes civile, punësimi etj. Përmes presioneve psikologjike dhe përndjekjes së debitorëve dhe familjarëve të tyre nëpërmjet telefona të vazhdueshme kanë arritur të nënshkruajnë marrëveshje të reja të kredive, duke rritur vlerën e borxhit.
Këto shoqëri thekson prokuroria kanë përdorur gënjeshtrën që konsistonte në përllogaritjen e një detyrimi të fryrë dhe pa asnjë bazë ligjore. Ata kanë sekuestruar llogaritë bankare të debitorëve duke i lënë mijëra qytetarët pa minimumin jetik.
Sipas prokurorisë, këta shoqëri kanë sekuestruar pronat e paluajtshme edhe kur vlera e papaguar e kredisë është shumë e vogël dhe këta prona i kanë shitur në ankande fiktive dhe pronat kanë vlerësuar fiktivisht.
“Të gjitha veprimet e sipërcituara janë kryer me qëllim për të shtrënguar dhe detyruar debitorët për të marrë kredi të reja me vlerë principial të fryrë dhe me interesa shumë të larta, duke gënjyer që po “ristrukturojnë të vjetrën” apo për të paguar detyrime në vlera të fryra që nuk mbështeteshin në vlerat fillestare të urdhrave ekzekutues të dala nga gjykatat.
Si rrjedhojë shoqëritë MCA dhe Final kanë përfituar të ardhura dhe pasuri të paligjshme, të cilat ua kanë vjedhur dhe zhvatur qytetarëve, që përllogariten në 10-tra milion Euro sipas mënyrës së sipërcituar, para dhe prona të cilat i kanë investuar apo përdorur në aktivitete të tjera”, thekson prokuroria.
Në këtë skemë mashtrimi që ka prekur të paktën 30 mijë qytetarë janë të përfshirë edhe përmbarues, në zyrat e të cilëve ditën e sotme është ushtruar po ashtu kontroll. Për skandalin e mikrokredive, pasi “fjeti” më shumë se 4 vite prokuroria e Tiranës mbi dosje nxori disa masa sigurie ndaj disa prej të cilëve ku më kryesori ishte Arben Meskuti. Qytetarët janë zhvatur në atë pikë sa kanë shkuar deri në vetëvrasje sic ishte rasti i Pal Trashaj. Për këtë skandal, SPAK po heton edhe guvernatorin e Bankës së Shqipërisë, Gent Sejko
