Në Shqipëri zgjedhjet blihen ose vidhen. Gjithmonë ka kundërshti. Në politikë ndodh rëndom. Por tashmë po ndodh në çdo fushë ku zhvillohen zgjedhje. Edhe në universitete.
VNA ka mësuar se në Fakultetin e Shkencave Mjekësore Teknike, po konsumohet një skandal. Në heshtje kuptohet. Sepse mediat as që kanë interes ta trajtojnë. Ose kur e trajtojnë e bëjnë në mënyrë të njëanshme, mbi bazë interesash. Por, ta sqarojmë detaj pas detaji e hap pas hapi çka ndodhur e çfarë po ndodh. Në garë për dekan të këtij fakulteti ishin Ergys Ramosaçaj bashkëshorti i zv. ministres së Shëndetësisë, Entela Ramosaçaj dhe Ilirjana Zekja, dekane aktuale.
Në përfundim të numërimit të votave fitues rezultoi Ramosacoj, me dy vota diferencë. Për shkak të rezultatit të ngushtë, Zekja kërkoi rinumërim të votave. Komisioni I Apelimit e pranoi kërkesën e saj. Komisioni institucional zgjedhor duhet të rihapë kutitë që po mbahen në një nga auditoret dhe të rinumërojë votat. Në këtë mënyrë certifikohet fituesi.
Por, për çudi kjo nuk ndodh. Vendimi i Komisionit të Apelimit nuk zbatohet. Në koridoret e fakultetit flitet për presione. Pa diskutuar se cili prej kandidatëve ka të drejtë, ajo cfarë duhet të shqetësojë gjithkënd, është se në vendin tonë, zgjedhjet gjithmonë kontestohen dhe vendimet nuk zbatohen. Kjo po ndodh edhe në fakultetin e infermierisë. Për fat të keq.
