Pas barazimit pa gola mes Serbisë dhe Shqipërisë në “Air Albania”, trajneri i përfaqësueses serbe, Dragan Stojkoviç, surprizoi me deklaratën e tij duke thënë se nuk kishte parë asgjë armiqësore në stadium dhe se kishte përjetuar një atmosferë ndeshjeje fantastike.
Këto fjalë u pritën si “shuplaka” nga mediat serbe, të cilat gjatë gjithë ditës kishin denoncuar provokime, keqtrajtime dhe kërcënime ndaj ekipit të tyre në Shqipëri. Portalet kryesore serbe, të njohura për qëndrimet e forta kundër shqiptarëve, nuk kursyen as trajnerin e tyre për këtë koment.
Mediat serbe reaguan ashpër, ndër to edhe portali “Kurir”, i cili botoi një artikull me titull:
“FJALË QË NUK DUHET TË THUHESHIN! Atmosfera e urrejtjes së paparë ndaj gjithçkaje serbe në Tiranë është gjithçka tjetër përveçse ‘fantastike’! Piksi, shiko lojtarët në sy! Nëse guxon!”
Deklarata e trajnerit Stojkoviç ka ndezur polemika të reja, duke theksuar sa e ndjeshme mbetet marrëdhënia midis dy vendeve, edhe përtej futbollit.
