Kuvendi i Shqipërisë pritet të miratojë këtë të enjte (17 shtator) projektligjin për përcaktimin e formulës së re të pagave të gjyqtarëve dhe prokurorëve. Ky votim synon t'i japë fund ngërçit financiar në sistemin e drejtësisë, ku magjistratët nuk i kanë marrë pagat e tyre prej tre javësh, por njëkohësisht formalizon një hendek të thellë mes propozimit të shumicës parlamentare dhe pretendimeve financiare të institucioneve të drejtësisë.
Formula e Re: Rritja me 85 Euro vs. Pretendimi prej 800 Eurosh
Projektligji i propozuar nga mazhoranca socialiste parashikon që paga referuese e magjistratëve të rritet nga 36% në 38% të pagës së Presidentit të Republikës.
Në terma financiarë, kjo formulë përkthehet në një rritje prej rreth 8,500 lekësh (afërsisht 85 euro) në muaj mbi rrogën referuese.
Nga ana tjetër, Këshilli i Lartë Gjyqësor (KLGJ) dhe Këshilli i Lartë Prokurorial (KLP) mbrojnë një pretendim rreth 9-fish më të lartë. Sipas përllogaritjeve të institucioneve të sistemit, zbatimi i plotë i indeksimit duhet t'u sigurojë magjistratëve një rritje prej rreth 80,000 lekësh (afërsisht 800 euro) në muaj.
Sa i përket detyrimeve të prapambetura që kapin faturën e 1.5 miliardë lekëve (rreth 15 milionë euro), qeveria propozon shlyerjen e tyre me këste brenda një periudhe 2-vjeçare.
Qëndrimi i Mazhorancës dhe Ekzekutivit: "E garanton Kushtetuesja, por brenda buxhetit"
Gjatë shqyrtimit në Komisionin e Ekonomisë dhe Financave, propozuesja e draftit, deputetja e PS-së Aulona Bylykbashi, sqaroi se nisma mbron statusin e magjistratëve pa cenuar qëndrueshmërinë financiare të shtetit.
"Me këtë nismë synojmë të zbatojmë vendimin e Gjykatës Kushtetuese. Synojmë përcaktimin e pagave, por edhe pabarazinë në hierarkinë brenda sistemit. Neni 138 garanton se pagat e përfitimeve dhe gjyqtarëve nuk mund të ulen. Kushtetuesja nuk na ka referuar një formulë të detyrueshme, zgjedhja është te ligjvënësi me kushtin që të mos ketë ulje. Koeficienti 0.38 është zgjedhur për garancitë kushtetuese për magjistratë, por edhe nga ana tjetër ta themi hapur, ka marrë në konsideratë mundësitë e buxhetit të shtetit."
Nisma ka marrë edhe mbështetjen e plotë të ekzekutivit. Përfaqësuesi i Ministrisë së Drejtësisë u shpreh gjatë mbledhjes:
"Falënderojmë propozuesit. Mendojmë se plotëson kushtet e vendosura nga Gjykata Kushtetuese."
Ndërsa përfaqësuesja e Ministrisë së Financave konfirmoi fizibilitetin financiar të propozimit: "Kostoja është e pranueshme, jemi dakord."
Opozita Kundër: "Pasojë e moszbatimit në kohë të Kushtetueses"
Partia Demokratike ka bërë me dije se do të votojë kundër projektligjit në seancën plenare. Deputeti Enno Bozdo akuzoi qeverinë se krijoi vonesa artificiale dhe se po dëmton autoritetin e vendimeve të Gjykatës Kushtetuese:
"Kjo situatë është pasojë e drejtpërdrejtë e mosrespektimit të vendimeve të Gjykatës Kushtetuese. Që në prill iu kërkua qeverisë një projektligj dhe nuk e solli, por e sollën kolegët. Ne nuk na intereson fare, vendimi i Gjykatës Kushtetuese është ligj për ne. Në emër të grupit njoftoj se ne do të votojmë kundër këtij projektligji."
Miratimi i këtij drafti të enjten pritet të zhbllokojë menjëhitshëm ekzekutimin e pagave mujore për të gjithë trupën e gjyqtarëve dhe prokurorëve në vend. Megjithatë, mospërputhja mes rritjes prej 85 eurosh të miratuar nga Kuvendi dhe pretendimit prej 800 eurosh të mbështetur nga KLGJ e KLP paralajmëron se debati ligjor mund të transferohet sërish në Gjykatën Kushtetuese pas hyrjes në fuqi të ligjit.
