Kuvendi i Shqipërisë zhvillon sot seancën e radhës plenare, e cila nis në orën 12:00 dhe pritet të jetë ndër më të ngarkuarat e kësaj periudhe parlamentare. Pak para saj, në orën 11:00, Grupi Parlamentar i Partisë Demokratike do të zhvillojë një mbledhje për të vendosur nëse do të marrë pjesë në punimet e Kuvendit, pas bojkotit të dy seancave të fundit.
Në rendin e ditës janë raporti vjetor i Këshillit Kombëtar të Integrimit Europian, projektligji për Shoqëritë Evropiane të Bashkëpunimit (SHEB), si dhe shqyrtimi i projektrezolutave për veprimtarinë e një sërë institucionesh kushtetuese dhe të drejtësisë.
Mes tyre janë Avokati i Popullit, Këshilli i Lartë Gjyqësor, Këshilli i Lartë i Prokurorisë, Kontrolli i Lartë i Shtetit, Prokuroria e Përgjithshme, Struktura e Posaçme Kundër Korrupsionit dhe Krimit të Organizuar (SPAK) dhe Inspektori i Lartë i Drejtësisë.
Vëmendja politike mbetet te vendimi që do të marrë opozita, e cila do të përcaktojë nëse Kuvendi do të zhvillojë seancën me pjesëmarrjen e plotë të grupeve parlamentare apo bojkoti do të vijojë.
