Kryetari i Grupit Parlamentar të Partisë Demokratike, Gazment Bardhi, ka lëshuar akuza të forta ndaj katër anëtarëve të Gjykatës Kushtetuese, të cilët i konsideron se kanë vepruar politikisht në mbrojtje të Kryeministrit Edi Rama, duke refuzuar hetimin parlamentar për çështjen “McGonigal”.
Në një reagim të gjatë mbi arsyetimin e vendimit nr. 62/2026 të Gjykatës Kushtetuese, Bardhi shprehet se trupa kushtetuese ka përdorur standarde të ndryshme për dy kërkesat e opozitës, duke pranuar hetimin parlamentar për zgjedhjet e 11 majit, por duke rrëzuar kërkesën për ngritjen e një komisioni hetimor për çështjen “McGonigal”.
Sipas tij, katër gjyqtarët kushtetues – kryetarja Fiona Papajorgji dhe anëtarët Sonila Bejtja, Sandër Beci dhe Ilir Toska – kanë ndërtuar argumente që, sipas Bardhit, nuk ishin përdorur as nga shumica parlamentare për të justifikuar rrëzimin e kërkesës.
“Detyra kushtetuese e gjyqtarëve të Gjykatës Kushtetuese nuk është të shpikin argumente për të ‘shpëtuar’ Edi Ramën. Detyra e tyre është të kontrollojnë kushtetutshmërinë e argumenteve të paraqitura nga shumica parlamentare,” shprehet Bardhi.
Ai shkon edhe më tej, duke deklaruar se katër gjyqtarët kanë hyrë në garë politike për mbrojtjen e Kryeministrit.
“Është një guxim i madh që atë që nuk e shpik dot as Taulant Balla për të mbrojtur Edi Ramën, e shpikin gjyqtarët kushtetues Fiona Papajorgji, Sonila Bejtja, Sandër Beci dhe Ilir Toska. Detyra e tyre nuk është të konkurrojnë me Taulant Ballën se kush e mbron më shumë Edi Ramën, por të japin drejtësi kushtetuese,” shkruan ai.
Bardhi argumenton se kërkesa e opozitës identifikonte qartë subjektin dhe objektin e hetimit parlamentar, duke pretenduar se në dokument ishin përshkruar veprimet që kërkohej të hetoheshin në lidhje me çështjen “McGonigal”, përfshirë takimet, favorizimet e dyshuara dhe ndërhyrjet e pretenduara në sektorin e hidrokarbureve.
Në fund të reagimit, kreu i grupit parlamentar të PD-së deklaron se, megjithëse e konsideron vendimin e Gjykatës Kushtetuese “fyes dhe të papranueshëm”, opozita do ta respektojë atë dhe do të riformulojë kërkesën për ngritjen e Komisionit Hetimor, duke e depozituar sërish në Kuvend.
Sipas Bardhit, nëse edhe pas kësaj kërkesa rrëzohet, atëherë do të krijohej përshtypja se në praktikën e Gjykatës Kushtetuese është konsoliduar një parim i ri: “Edi Rama i paprekshëm.”
