Aktivisti Erjon Murataj ka sqaruar se Kuvendi Qytetar i protestës nuk do të ketë në përbërje deputetë apo drejtues të partive politike, duke theksuar se ky forum synon të mbetet një strukturë e pavarur qytetare.
I ftuar në A2 CNN, Murataj u shpreh se deputetët dhe krerët e partive të vogla janë të mirëpritur të marrin pjesë në protestat qytetare si qytetarë, por jo si vendimmarrës në Kuvend.
“Një deputet i PD nuk mund të vijë në Kuvendin Qytetar, nuk bëhet anëtar i Kuvendit. Është i lutur çdo deputet që nuk ka në ndërgjegjen e tij para publike të grabitura të jetë në shesh si qytetar, por jo të jetë vendimmarrës në një institucion shoqëror që është antipodi i sistemit që e ka marrë peng Shqipërinë. Krerët e partive të vogla i kam parë në shesh dhe kanë bërë detyrën qytetare, por në Kuvend nuk ekziston vend për ta”, deklaroi Murataj.
Ai bëri të ditur gjithashtu se shumë shpejt do të mblidhet një asamble edhe më e gjerë, e cila do të përmbyllë procesin e zgjedhjes dhe përzgjedhjes përfundimtare të anëtarëve të Kuvendit Qytetar.
Sipas Muratajt, kjo fazë do të shërbejë për konsolidimin e strukturës së forumit qytetar, i cili synon të funksionojë i pavarur nga partitë politike dhe përfaqësuesit e tyre.
