Aktori dhe një nga aktivistët e protestës qytetare që prej 50 ditësh zhvillohet në Bulevardin “Dëshmorët e Kombit”, Florjan Binaj, është distancuar nga Kuvendi Qytetar, duke deklaruar se nuk kishte asnjë dijeni për krijimin e tij dhe se nuk e konsideron përfaqësues të protestës.
Në një intervistë në A2 CNN, Binaj tha se nuk ishte ftuar dhe as informuar për mbledhjen, ndërsa pamjet e publikuara i kanë lënë përshtypjen e një organizimi të stisur.
“Unë jo vetëm që s’isha i pranishëm, por nuk kisha dijeni fare që është krijuar një kuvend. Dje pashë ato pamje dhe, me thënë të drejtën, mu duk diçka e stisur. Mu duk diçka jo shumë përfaqësuese, sepse nëse do të bëhej një gjë e tillë, duhej të pyeteshin të gjithë njerëzit që janë në shesh”, u shpreh ai.
Binaj tha se nga personat e pranishëm njohu vetëm Armir Shkurtin dhe Sazan Gurin, ndërsa pjesën tjetër nuk i njihte.
Sipas tij, pas kësaj lëvizjeje fshihet një përpjekje e politikës për ta përçarë protestën nga brenda, pasi, sipas tij, metodat e përdorura deri më tani për ta dobësuar nuk kanë funksionuar.
“Përpjekja është nga politika. Pasi i harxhuan të gjithë fishekët me të cilët kanë vrarë protestat e mëparshme, tani po përpiqen ta çajnë nga brenda. Të fusin elementë radikalë, njerëz problematikë dhe të krijojnë struktura paralele që njerëzit të mos e gjejnë më veten se ku janë. Qëllimi është të zhbëjnë atë që është ndërtuar në shesh”, deklaroi Binaj.
Ai shtoi se nuk përjashton mundësinë që të krijohen edhe struktura të tjera paralele, me emërtime të ndryshme, me synimin për të krijuar konfuzion dhe për të dobësuar protestën.
Duke folur për mënyrën se si funksionon lëvizja qytetare, Binaj theksoi se mungesa e një drejtuesi është pikërisht arsyeja pse protesta ka arritur të mbijetojë për kaq gjatë.
“Protesta është një trup që merr frymë, fryhet dhe shfryhet, sepse përbëhet nga njerëzit. Protesta nuk ka kokë dhe unë përfaqësoj vetëm veten time. Kam vënë gjithë peshën time publike në mbështetje të kësaj proteste, sepse besoj se kërkesat e saj janë të drejta. Ne nuk kemi përfaqësi dhe ky ka qenë suksesi i jetëgjatësisë së kësaj proteste”, u shpreh ai.
Në përfundim, aktori vlerësoi se një nga arritjet më të rëndësishme të protestës ka qenë ndërgjegjësimi i qytetarëve dhe ndërkombëtarizimi i çështjeve që lidhen me zhvillimet në vend, veçanërisht mbrojtjen e natyrës dhe të zonave të mbrojtura.
