“Sigurimi i Shtetit është arma e mprehtë dhe e dashur e Partisë sonë, sepse ajo mbron interesat e popullit dhe të shtetit tonë socialist kundër armiqve të brendshëm dhe të jashtëm.” Ky citat i Enver Hoxhës për Sigurimin e Shtetit nuk ishte thjesht një formulim retorik, por përfaqësonte thelbin e kontrollit absolut mbi qytetarët në Shqipërinë komuniste, ku as fëmijët nuk i shpëtonin syrit vigjilent të Partisë dhe organeve të saj.
Një dokument arkivor i vitit 1963 e pasqyron qartë këtë paranojë të kontrollit total. Po atë vit, përfaqësuesja e organizatës bazë të Partisë në shkollën “Emin Duraku” në Tiranë i dërgon një njoftim Komitetit Qendror të Partisë, ku raportonte: “Kostandin Pane, nxënës i klasës së dytë, kishte gjetur në koshin e plehrave një libër gjeografie dhe një fotografi të Hrushovit, të cilën e kishte ngjitur në stendën e gazetës së murit të klasës, duke pretenduar se aty ishte edhe shoku Enver.”
Ky “gabim” i një fëmije të klasës së dytë nuk kaloi pa u vënë re. Përkundrazi, ai u trajtua menjëherë si një çështje serioze, aq sa u raportua deri në instancat më të larta të Partisë.
Teksti i dokumentit arkivor:
"Tepër Sekret"
Tiranë, me 28.T. 1963
KOMITETIT QENDROR TE P.P.SH.
(Sekretarit te K.Q.P.P.Sh.Shokut
Rita Marko)
TIRANE
Bashkëngjitur ju dërgojmë informacionet e M.D. sekretare e organizatës baze te partisë te shkollës “Emin Duraku".
Verifikuam çeshtjet qe ngre ne informacionin e saj shoqja M. D. dhe rezulton se: A.D ka ndruar shtepine dhe me kete rast ay ka pastrue librat. Nder librat qe ay ka hedhur ne koshin e plehrave ka qene dhe libri i gjeografise me fotografi te ndryshme midis te cilave dhe fotografia e Hrushovit kur ka vene gurin e pare te pallatit te Kultures.
Kostandin Pane nxenes i klases se dyte te shkollës fillore e ka mare ne koshin e plehrave librin e gjeografise dhe ka pare fotografi te ndryshme midis te cilave edhe fotografine me Hrushovin dhe Liri Belishoven. Diten e Herë mbas dite data 21.1.1963 ne oren e dyte te mesimit ka hequr artikujt ne gazeten e murit te klases dhe ka vendosur ne to fotografine. Keto fotografi e vura thote ay sepse ishte dhe shoku Enver.
Kostandin Pane eshte djali i Petraq Panes N/drejtor dhe zv. sekretar i organizates baze te partisë ne shkollen e rezervave te ndertimit.
