“Komunikimi i sigurtë, është gjysma e punës për krimin e organizuar, i cili paguan shuma të majme që planet e trafikut të drogës apo krimeve kundër jetës të mos aksesohen nga të tretë. Hetimet e SPAK me autoritetet e huaja e kryesisht ato italiane, tregojnë se Encrochat dhe Sky nuk ishin të vetmit aplikacione komunikimi që përdoreshin prej tyre dhe as më të sigurtit”, raporton gazetarja Bleona Metushi.
Spectre, Secure Group, Security Chat dhe Matrix, ky i fundit i aksesuar tashmë nga autoritetet sipas një bashkëpunëtori drejtësie në Itali, bliheshin nga mafia atje për 5 mijë Euro secili në Spanjë.
Pajisjet që mbartin aplikacionet përkatëse kanë teknologji izraelite dhe u jepen bashkëpunëtorëve që merreshin me ato që konsiderohen punë operative në terren, siç ishin shqiptarët që nxirrnin kokainë nga portet e Italisë.
Një tjetër pajisje telefonike, por kjo e përdorur nga një rreth i ngushtë shqiptarësh që po ashtu bënin tërheqjen e kokainës nga portet, ishte edhe Google Pixel.
