Një tjetër arrestim është kryer në lidhje me vrasjen tronditëse të 56-vjeçarit Anesti Rama, në fshatin Frashër të Fierit. Policia ka ndaluar Çlirim Doganin, 55 vjeç, banues në Arapaj të Roskovecit, i cili dyshohet se ka bashkëpunuar me vajzën e viktimës, Emalinda Rama, në kryerjen e krimit makabër që ka tronditur opinionin publik.
Sipas burimeve hetimore, Çlirim Dogani, i martuar dhe baba i dy fëmijëve, ka qenë në një marrëdhënie intime me Emalindën, 26-vjeçaren e arrestuar më herët si autore kryesore e vrasjes së babait të saj. Kjo lidhje e fshehtë pritet të jetë çelësi për zbardhjen e plotë të motivit të krimit, që ka në thelb jo vetëm përplasjet familjare, por edhe refuzimin e Anesti Ramës për të pranuar zgjedhjet sentimentale të së bijës.
Njohja me Çlirimin dyshohet të ketë ndodhur në zonën e fshatrave Suk 1, Suk 2 dhe Arapaj të Roskovecit, ku Emanilda kishte qëndruar për disa kohë në shtëpinë e motrës së saj, e cila jeton prej vitesh në Itali, por është e martuar në Suk. Gjatë qëndrimeve të herëpashershme te kunati, Emalinda ka punuar në serat e fermerëve të zonës, dhe aty besohet se është njohur me Çlirimin, lidhje që më pas është kthyer në raport dashurie.
Emalinda ka qenë e fejuar tre herë më parë, por është ndarë nga secili prej partnerëve për shkak të kundërshtimit të fortë të babait të saj, i cili, sipas dëshmive, nuk pranonte asnjë lidhje që ajo krijonte. Ky konflikt i zgjatur duket se ka kulmuar me raportin e saj me Çlirimin, një burrë i martuar, të cilin Anesti e shihte si pengesë serioze dhe turp për familjen.
Vrasja, sipas Policisë, është kryer në mënyrë makabre, nëpërmjet strangulimit me tel, ndërsa janë përdorur edhe sende të forta dhe mjete prerëse. Fillimisht, ngjarja u tentua të paraqitej si aksidentale nga vetë Emalinda dhe nëna e saj, të dyja tashmë në pranga.
