Kuvendi i Kosovës miratoi në parim, me 91 vota pro, projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Votimi u zhvillua në një seancë të jashtëzakonshme, ndërsa jashtë godinës protestonin veteranët e UÇK-së, të cilët kërkonin miratimin e ndryshimeve.
Protesta e thirrur nga Organizata e Veteranëve të Luftës së UÇK-së u shoqërua me tensione. Gjatë fjalimeve të deputetëve, para Kuvendit u hodhën mjete piroteknike.
Në nisje të seancës ishin të pranishëm 101 deputetë. Lista Serbe mungoi, ndërsa deputetët e Lidhjes Demokratike të Kosovës nuk morën pjesë në votimin procedural për shmangien e procedurave, që i hapi rrugë shqyrtimit të projektligjit. Më herët, Komisioni për Legjislacion e kishte miratuar atë me nëntë vota pro dhe asnjë kundër.
Gjatë diskutimeve, kryeministri në detyrë, Albin Kurti, tha se ndryshimet ishin ndërmarrë me nxitim, por se Lëvizja Vetëvendosje do t’i mbështeste. Ai e cilësoi luftën e UÇK-së të drejtë dhe deklaroi se “për UÇK-në nuk mund të ketë gjyq”.
Kurti u ndal edhe te procesi i apelit për aktgjykimet ndaj ish-krerëve të UÇK-së. “Adresa e fitores është apeli”, u shpreh ai, duke kërkuar një strategji shtetërore dhe kombëtare, përtej ndasive partiake. Sipas tij, zbatimi i kësaj strategjie kërkon institucione funksionale, president dhe qeveri stabile.
Ndërkohë, zgjedhja e presidentit të ri mbetet një tjetër çështje kyçe për Kosovën. Deputetët kanë në dispozicion datat 5 dhe 6 tetor për përmbylljen e procesit, dështimi i të cilit do ta çonte vendin drejt zgjedhjeve të jashtëzakonshme. Kurti njoftoi gjithashtu një takim gjatë ditës me kryetarin e PDK-së, Bedri Hamza, pa dhënë hollësi për temat që do të diskutohen.
