Më 24 mars 1999, qielli mbi Kosovë u mbush me avionët e NATO-s, duke nisur një fushatë historike për t’i dhënë fund spastrimit etnik të kryer nga Serbia.
Pas muajsh përpjekjesh diplomatike të refuzuara nga Beogradi, aleanca ndërhyri për të ndalur dhunën dhe për të mbrojtur një popull që vuante.
Bombardimet, që zgjatën 78 ditë, ndëshkuan forcat serbe, të cilat reaguan me akte hakmarrëse tragjike: mbi 10,000 të vrarë, më shumë se 800,000 të përndjekur dhe rreth 5,000 të zhdukur.
Më 10 qershor 1999, një marrëveshje historike vulosi tërheqjen e ushtrisë serbe nga Kosova. Dy ditë më pas, trupat paqeruajtëse të KFOR-it hynë në tokën që kishte derdhur gjak për liri, duke i dhënë fund sundimit të Beogradit dhe hapur rrugën për një epokë të re.
Në 24 mars të vitit 1999, Kosova filloi të shkruante kapitullin e saj të lirisë.
