Koreja e Jugut ka hapur bazën e parë ushtarake të dedikuar transformimit përmes inteligjencës artificiale (IA), në një nismë që synon zhvillimin e robotëve të aftë për të kryer operacione të rrezikshme dhe për të ulur ekspozimin e ushtarëve ndaj situatave me rrezik për jetën.
Objekti i ri, i vendosur në Pangyo, në jug të Seulit, u inaugurua të hënën nga Ministria e Mbrojtjes. Sipas agjencisë së lajmeve Yonhap, duke iu referuar ministrisë, në këtë qendër do të trajnohen robotë humanoidë dhe robotë me shumë këmbë, duke përdorur të dhëna të inteligjencës artificiale fizike dhe modele të avancuara të IA-së. Në ceremoninë e hapjes morën pjesë rreth 150 zyrtarë, mes tyre përfaqësues të ministrive të shkencës dhe industrisë.
Robotët do të përgatiten për të kryer një sërë detyrash në terrene të rrezikshme, përfshirë transportimin e furnizimeve, asgjësimin e municioneve shpërthyese dhe pastrimin e fushave të minuara. Përmes përdorimit të këtyre sistemeve, autoritetet synojnë të kufizojnë përfshirjen e drejtpërdrejtë të personelit ushtarak në misione që mund të rezultojnë fatale.
Ministria e Mbrojtjes bëri të ditur se objektivi është krijimi i një qendre të avancuar në fushën e mbrojtjes, të specializuar në inteligjencën artificiale fizike, një teknologji që u mundëson makinerive të perceptojnë dhe të ndërveprojnë me mjedisin real.
Programi parashikon ngritjen e pesë bazave të transformimit përmes IA-së në të gjithë vendin, ku do të përfshihen degë të ndryshme të ushtrisë dhe Shefat e Shtabit të Përbashkët. Një prej këtyre objekteve do të vendoset në selinë e Shefave të Shtabit të Përbashkët, në zonën Yongsan të Seulit.
Paralelisht, autoritetet koreano-jugore synojnë të zgjerojnë bashkëpunimin me kompanitë private të teknologjisë, me qëllim përshtatjen për përdorim ushtarak të sistemeve të inteligjencës artificiale të zhvilluara fillimisht për sektorin civil.
Nisma vjen në një kohë kur Koreja e Jugut po investon gjithnjë e më shumë në automatizimin e kapaciteteve ushtarake, për shkak të rënies së lindshmërisë dhe mungesës së personelit në forcat e armatosura. Sipas raportimeve ushtria po zgjeron përdorimin e IA-së për të ruajtur gatishmërinë operacionale me më pak trupa, ndërsa po teston edhe robotë humanoidë në anijet luftarake.
