Një 52-vjeçar nga Kukësi ka rënë në prangat e Policisë së Tiranës pasi u kap duke transportuar mallra të dyshuara si të kontrabanduara, me qëllim tregtimin e tyre në tregun e shumicës në rrugën “5 Maji”. Në operacionin e koduar “Silent Load”, shërbimet e Policisë ndaluan furgonin e tij në rrugën “Bardhyl”, ku gjatë kontrollit u gjetën dhe sekuestruan si provë materiale veshje sportive, me vlerë totale 40 mijë euro.
Nga hetimet paraprake ka rezultuar se shtetasi i arrestuar kishte qëllim shitjen e tyre në dyqane të ndryshme të kryeqytetit. Materialet procedurale i janë referuar Prokurorisë së Tiranës për veprime të mëtejshme.
Njoftimi i Policisë:
DVP Tiranë/Finalizohet nga Seksioni për Hetimin e Krimit Ekonomik dhe Financiar, operacioni policor i koduar “Silent Load”.
Vihet në pranga drejtuesi i një furgoni duke transportuar për te tregu i shumicës mallra të dyshuara si të kontrabanduara.
Sekuestrohen mallra (veshje sportive), të dyshuara si të kontrabanduara, me vlerë totale 40 000 euro.
Specialistët e Seksionit për Hetimin e Krimit Ekonomik dhe Financiar në DVP Tiranë, bazuar edhe në informacionet e marra në rrugë operative, organizuan dhe finalizuan operacionin policor të koduar “Silent Load”.
Si rezultat i këtij operacioni u bë arrestimi në flagrancë i shtetasit Sh. Xh., 52 vjeç, banues në Kukës.
Shërbimet e Policisë, në rrugën “Bardhyl”, kanë lokalizuar dhe ndaluar furgonin me drejtues 52-vjeçarin, në të cilin, gjatë kontrollit, u gjetën dhe u sekuestruan, në cilësinë e provës materiale, mallra (veshje sportive) të dyshuara si të kontrabanduara, me vlerë totale 40 000 euro.
Nga hetimet ka rezultuar se ky shtetas do t’i shiste veshjet në dyqane të ndryshme të një tregu të shumicës në rrugën “5 Maji”.
Materialet procedurale iu referuan Prokurorisë së Tiranës, për veprime të mëtejshme.
