Zbardhen emrat e shtatë personave të arrestuar gjatë aksionit të djeshëm të urdhëruar nga SPAK, ku pas zbërthimit të aplikacionit të koduar Sky ECC u siguruan të dhëna për përfshirjen e tyre në trafikun e kokainës nga Amerika Latine drejt vendeve të BE-së. Në pranga përfunduan Arjan Gjata, Vilson Roçi, Musa Gjikola, Akil Alushi, Jani Meçja, Selami Lushkaj, ndërsa ish-oficeri i policisë Erion Dani u vetëdorëzua në policinë e Himarës. Të gjithë të dyshuarit dolën këtë të shtunë përpara Gjykatës së Posaçme, ku u njohën me masën e sigurisë “arrest me burg”. Grupi kriminal u godit pas një hetimi 2-vjeçar të drejtuar nga prokurori i posaçëm Adnand Xholi. Hetimet hodhën dritë mbi 7 raste të trafikimit të kokainës, heroinës dhe kanabis sativa, përgjatë viteve 2020-2021. Konkretisht, në këto shtatë episode janë sekuestruar 3585 kg kokainë, 701 kg kanabis sativa dhe 4.2 kg heroinë.
SPAK zbuloi edhe përfshirje të zyrtarëve të policisë në aktivitet kriminal, ku të paktën në 3 episode dyshohet të jetë konsumuar vepra e “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim.
“Të hetuarit kanë ofruar dhe kanë premtuar përfitime të parregullta për të ushtruar ndikim tek funksionarë të drejtësisë, me qëllim lehtësimin e masës së sigurimit personal apo zbutjen e masës së dënimit në episodet respektive, kundrejt përfitimit të shumave monetare prej 7,500 euro, 4,000 euro dhe 4,000 euro”, njoftoi SPAK.
Prokuroria e Posaçme firmosi 13 urdhër-arreste, ku gjashtë prej të dyshuarve nuk janë arrestuar ende, pasi dyshohet se ndodhen jashtë vendit.
