Dy prokurorët e posaçëm Elida Kaçkini dhe Behar Dibra janë përplasur në procesin ndaj Festim Bexhdilit, kopshtarit të kompleksit “Golden Resort”, i akuzuar për rrëmbimin dhe zhdukjen e Jan Prengës në vitin 2020.
Në seancën në Apelin e Posaçëm, prokurorja Kaçkini kërkoi dënimin me burgim të përjetshëm për Bexhdilin, ndërsa prokurori Dibra kërkoi rikualifikimin e veprës penale dhe dënimin e tij me 20 vite burgim. Gjykata u tërhoq për vendim, i cili pritet të shpallet më 25 korrik.
Bexhdili ishte dënuar më parë me burgim të përjetshëm, por Gjykata e Lartë ktheu dosjen për rigjykim.
Kaçkini: Burgim i përjetshëm është proporcional
Prokurorja Kaçkini argumentoi se vendimi i dhënë nga GJKKO duhet të lihet në fuqi, duke theksuar se rrëmbimi ishte i paralajmëruar dhe se Bexhdili ka pasur rol aktiv në ngjarje.
“I pandehuri është gjendur në kompleks, referuar pamjeve filmike, në orën 11:19 dhe ka pritur në derën e garazhit ku më pas futet makina Audi A6 e Altin Hajrit. Kjo mënyrë ndërveprimi tregon se ata kanë pasur dijeni dhe kanë shkuar për të kryer rolet e tyre. Veprimet e kryera tregojnë bindshëm se Festim Bexhdili ka pasur dijeni për ngjarjen, ka mbajtur qëndrim mohues dhe nuk ka shprehur pendesë,” deklaroi Kaçkini.
Dibra: Nuk ka prova që Bexhdili dinte për ngjarjen
Ndërkohë, prokurori Dibra mbajti qëndrim të ndryshëm, duke theksuar se Bexhdili mund të ketë qenë në kompleks për shkak të punës, pasi ishte kushëri i Altin Hajrit dhe nuk kishte dijeni për personat e tjerë të përfshirë.
“Në orën 18:49, Bexhdili ndihmon në nxjerrjen e Jan Prengës nga bagazhi dhe më pas trupi zhvendoset në një automjet tjetër që largohet pa trupin. Trupi ende nuk është gjetur dhe nuk mund të kërkohet nga i pandehuri të sqarojë diçka që ndoshta nuk e di,” tha Dibra.
Për rrëmbimin dhe zhdukjen e Jan Prengës akuzohen edhe Dritan Rexhepi dhe Gentian Doci Funiqi, si dhe Geraldo Martini, Aldo Majnishta, Korado Genjështa. Po ashtu po gjykohet në një proces të ndarë edhe Altin Hajri, pronari i Golden Resort.
